Хитой Яман қирғоқлари яқинидаги немис самолётига лазер ёрдамида ҳужум қилиб, экипажни хавф остига қўйди ва миссияни барбод қилди. Бу ҳақда Германия Ташқи ишлар вазирлиги хабар берди.
Самолёт Европа Иттифоқининг фуқаролик кемаларини ҳусийлар ҳужумидан ҳимоя қилаётган эди. Шу сабабли учоқ Қизил денгизда патруллик қилаётган бўлган.
Хитой ҳарбийлари Европа Иттифоқининг Aspides операцияси доирасидаги немис самолётига қарши лазер қуролини қўллади. Германия ходимларини хавф остига қўйиш ва операцияни барбод қилишга уринишларни мутлақо қабул қилиб бўлмайди, дейилади Германия ТИВ баёнотида.
Ҳолат юзасидан немис дипломатлари Хитой элчисини тушунтириш бериш учун чақиртирган. Spiegel нашри маълумотларига кўра, ҳодиса Хитой фрегатига самолёт яқинлашаётганда юз берган. Немис самолётига зарар етган-етмагани ҳозирча номаълум.
Ҳужум Aspides операцияси учун ижарага олинган немис разведка самолётига қарши амалга оширилган. Уни фуқаролик учувчилари бошқаради ва у тўртта Бундесвер аскарини олиб юриши мумкин. Самолётнинг ўзи Жибутида жойлашган.
6 ва 7 июль кунлари ҳусийлар (Яман ҳаракати) апрель ойидан бери илк бор Қизил денгиздаги иккита юк кемасига ҳужум қилди. Биринчи ҳолатда экипаж қутқарилган, иккинчисида эса зарба оқибатида икки киши ҳалок бўлган, яна икки киши жароҳатланди.
Изоҳ (0)