Исроил агар Лондон Фаластинни тан олса у билан мудофаа ва хавфсизлик соҳасидаги ҳамкорликни тўхтатиш имкониятини кўриб чиқмоқда. Бу ҳақда дипломатик манбаларга асосланиб The Times нашри хабар бермоқда.
Манбаларга кўра, Исроил бош вазири Биньямин Нетаньяху ҳукумати, агар Буюк Британия келгуси ойда Фаластинни тан олиш жараёнини давом эттирса, бу жавобни вариантлардан бири сифатида кўриб чиқмоқда.
“Лондон эҳтиёткор бўлиши керак, чунки Биби (Нетаньяху) ва унинг вазирларида фойдаланиши мумкин бўлган кўплаб имкониятлар бор. Исроил Буюк Британия билан ҳамкорликни қадрлайдиган бўлса-да, сўнгги қарорлар унинг босим остида эканини кўрсатади. Агар Исроил ҳукумати жавоб чораларини қўллашга қарор қилса, Буюк Британия кўп нарсани йўқотиши мумкин”, дейди манба.
Нашрнинг ёзишича, сўнгги икки йил ичида Исроил разведкаси Британия махсус хизматларига таҳдидлар ҳақидаги энг муҳим маълумотларни тақдим этган. Хусусан, Исроилнинг “Моссад” ташқи разведка хизмати британиялик ҳамкасбларига муҳим маълумотларни етказган, бу эса Лондондаги Исроил элчихонасига қарши Эрон билан боғлиқ бўлган тахмин қилинган терактнинг олдини олишга ёрдам берган. Бу Буюк Британияда сўнгги йиллардаги иккита энг йирик аксилтеррор операциясига олиб келган.
“Шунингдек, Бирлашган Қироллик Ироқ ва Афғонистондаги разведка операциялари учун Исроил томонидан ишлаб чиқарилган дронлардан фойдаланган, Исроил мудофаа ускуналари эса ҳар икки давлат билан бўлган ҳарбий можаролар пайтида британиялик аскарларнинг ҳаётини сақлаб қолган”, деб таъкидланади нашрда.
Бундан аввал Буюк Британия агар Исроил Ғазо секторига инсонпарварлик ёрдамини етказиб беришни тўхтатишда давом этса ва анклавдаги ҳарбий операцияни тугатмаса, сентябрда БМТ Бош ассамблеяси сессияси бошланишидан олдин Фаластин давлатини тан олишга тайёрлигини билдирганди.
Шунингдек, Франция президенти Эммануэл Макрон сентябрь ойида бўлиб ўтадиган БМТ Бош ассамблеяси сессиясида мамлакат Фаластин давлатини расман тан олишини эълон қилганди.
Изоҳ (0)