Абдуқодир Ҳусанов Осиёнинг энг қиммат 3-футболчисига айланди

Transfermarkt портали июнь ойининг бошидан бери футболчиларнинг трансфер қийматларини янгилаб бормоқда. Хусусан, 30 май куни Англия Премьер Лигаси, 3 июнь куни Франция чемпионати, 5 июнь куни Германия Бундеслигаси, 9 июнь куни Испания Ла Лигаси ва 17 июнь куни Италия А Серияси футболчилари рейтинги янгиланди. Шу муносабат билан Европанинг топ-5 чемпионатида тўп сураётган осиёлик энг қиммат 10 нафар футболчининг трансфер нархидаги ўзгаришларга тўхталишга қарор қилдик.

Англия Премьер Лигаси

Англия Премьер Лигасида ҳаракат қилаётган Абдуқодир Ҳусановнинг трансфер қиймати 35 миллион евро бўлиб, ўзгаришсиз қолди. Бироқ бошқа футболчиларнинг нархида ўзгаришлар кузатилди. “Брайтон” жамоасининг япониялик чап қанот вингери Каору Митоманинг қиймати 5 миллион еврога камайди ва ҳозирда унинг баҳоси 40 миллион еврога тенг. Шунингдек, “Тоттенҳэм” футболчиси Сон Ҳён Миннинг трансфер баҳоси 10 миллион еврога арзонлашиб, 20 миллион евро этиб белгиланган.

Франция Лига 1

Франция чемпионатида тўп сураётган Ли Кан Иннинг трансфер нархи ҳам пасайди. “ПСЖ” футболчиси июнь ойидаги янгиланишдан сўнг 25 миллион еврога баҳоланмоқда. Аввалги нархи эса 30 миллион евро эди.

Германия Бундеслигаси

Германия Бундеслигасида тўп сураётган Ким Мин Жаэ трансфер нархининг пасайишига дуч келди. “Бавария” ҳимоячиси ва Жанубий Корея терма жамоаси аъзоси 5 миллион еврога арзонлашиб, ҳозирда 40 миллион еврога тенг баҳоланмоқда. “Бавария”нинг яна бир япониялик футболчиси Ҳироки Ито ҳам 5 миллион еврога арзонлашган — унинг нархи ҳозирда 25 миллион еврога тенг. “Фрайбург” жамоасининг вингери Рицу Доан 3 миллион еврога қимматлашиб, унинг қиймати 25 миллион еврога етди. “Майнц” ва Япония терма жамоаси ярим ҳимоячиси Каишу Сано ҳам 3 миллион еврога ошди. Унинг ҳозирги нархи — 20 миллион евро.

Испания Ла Лигаси

Осиёнинг энг қиммат 10 футболчиси орасида Ла Лигада тўп сураётган ягона футболчи — Такефуса Кубо. Июнь ойидаги янгиланишдан сўнг “Реал Сосьедад” футболчисининг нархи 10 миллион еврога камайди. Аввал 40 миллион евро бўлган Кубо ҳозирда 30 миллион еврога баҳоланмоқда.

Италия А Серияси

Италия чемпионатида ҳам футболчиларнинг трансфер қийматлари янгиланди. Ўзбекистон терма жамоаси ва “Рома” клуби ҳужумчиси Элдор Шомуродовнинг трансфер нархи 1 миллион еврога ошиб, 5 миллион еврога етди. “Парма” клуби дарвозабони Зион Suzuki ҳам Осиёнинг энг қиммат 10 футболчиси қаторига кирди. Унинг трансфер баҳоси 6 миллион еврога ошиб, ҳозирда 20 миллион еврога тенг деб баҳоланмоқда.

Осиёнинг энг қиммат 10 футболчиси:

1. Каору Митомо — “Брайтон” 40 млн евро (олдинги нархи 45 млн евро)
2. Ким Мин Жаэ — “Бавария” 40 млн евро (олдинги нархи 45 млн евро)
3. Абдуқодир Ҳусанов — “Манчестер Сити” 35 млн евро (олдинги нархи 35 млн евро)
4. Такефуса Кубо — “Реал Сосьедад” 30 млн евро (олдинги нархи 40 млн евро)
5. Ле Кан Ин — “ПСЖ” 25 млн евро (олдинги нархи 30 млн евро)
6. Рицу Доан — “Фрайбург” 25 млн евро (олдинги нархи 22 млн евро)
7. Ҳироки Ито — “Бавария” 25 млн евро (олдинги нархи 30 млн евро)
8. Каишу Сано — “Майнц” 20 млн евро (олдинги нархи 17 млн евро)
9. Зион Сузуки — “Парма” 20 млн евро (олдинги нархи 14 млн евро)
10. Сон Ҳён Мин — “Тоттенҳэм” 20 млн евро (олдинги нархи 30 млн евро).