Уч йиллик ҳарбий хизматдан сўнг, BTS гуруҳи тўлиқ таркибда яна бирлашади. Афсонавий корейс гуруҳи бир ой ичида фаолиятини тиклайди.
Жамоанинг етти аъзоси мажбурий ҳарбий хизматни якунламоқда ва бутун дунё бўйлаб мухлислар уларнинг қайтишини интиқлик билан кутмоқда. Бу қайтиш эса Жанубий Корея иқтисодиётига катта таъсир кўрсатиши мумкин.
Корейс гуруҳининг 6 аъзоси, жумладан Жин, Жей-Хоуп, РМ, Ви, Чимин ва Чонгук аллақачон ҳарбий хизматдан озод қилинган. Юнги эса июнь охирида хизматни тугатади. Иқтисодчилар фикрича, гуруҳнинг қайтиши Жанубий Кореяга миллиардлаб доллар келтириши мумкин. Чунки концерт фаолияти тикланади, туризм ривожланади, мусиқа савдоси кўпаяди ва корейс маданиятининг дунёдаги таъсири ортади.
2019 йилда Hyundai Research Institute таҳлилчилари BTS йиллик иқтисодиётга 4,65 миллиард доллардан ортиқ даромад келтиришини ҳисоблаб чиқишган. Бу эса 500 минг оддий ишчининг умумий даромадидан кўп. Бунинг барчаси чипталар, альбомлар, реклама, стриминг, мода ва ҳатто корейс тилини оммалаштириш ҳисобига келган.
Гуруҳга қизиқиш шунчалик катта эдики, тўрт аъзонинг қайтиши ҳақида хабар NYBЕ агентлигининг акцияларини бир кун ичида 7% га оширишга сабаб бўлди. 2022 йилда Пусанда бўлиб ўтган BTS’нинг бепул концертида 50 мингдан ортиқ мухлис йиғилиб, ярим миллиард доллардан ошиқ иқтисодий фойда келтирган.
Ҳозирда гуруҳнинг расмий режалари ошкор қилинмаган, аммо 2025 йил охирига янги альбом чиқиши кутилмоқда. Шунингдек, дунёда энг йирик саёҳатлардан бири бўлиши мумкин бўлган глобал тур режалаштирилмоқда.
Изоҳ (0)