Польша бош вазири Матеуш Моравецкий мамлакат Беларусь билан чегарада тўсиқ қуриб битирганини маълум қилди, деб ёзади «Коммерсантъ». Деворни қуриш Яқин Шарқдан келган қочқинларнинг Беларусь чегараси орқали республика ҳудудига ўтишга кўп марта уринишларидан кейин январь охирида бошланган эди.
Моравецкий таъкидлашича, Польша ҳукумати тўсиқни, ваъда қилинганидек, ёз бошигача қуриб битказишга улгурган.
«Сиёсий жиҳатдан содир бўлиши мумкин бўлган ҳодисаларни олдиндан кўра билганимиз шарофати билан эътиборимизни ҳозир ўз суверенитетини ҳимоя қилиш учун курашаётган Украинага ёрдам беришга қарата оламиз», — деди Польша бош вазири брифингда чегарадаги девор афзалликлари ҳақида гапирар экан. Унинг фикрича, Польша-Беларусь чегарасида Александр Лукашенко ташаббуси билан юзага келган инқироз Украинада низо яқинлашиб келаётганининг биринчи белгиси бўлган.
Аввалроқ девор узунлиги 186 км (чегаранинг жами узунлиги 418 км), баландлиги эса 5 метр бўлиши режалаштирилган эди. Лойиҳа қиймати 370 миллион долларга баҳоланган, конструкцияни ҳаракат датчиклари ва тунги кузатув камералари билан жиҳозлаш кўзда тутилган эди.
2021 йил августидан буён Польша ва Беларусь чегарасида Яқин Шарқ мамлакатларидан чиққан қочқинлар пайдо бўла бошлади. Миграция инқирози ўтган йил 8 ноябрда кучайди, ўшанда қарийб 2 минг нафар ноқонуний муҳожир куч билан Польшага киришга уринди. Литва, Латвия ва Польша Беларусь ҳукуматини, хусусан, республика президенти Александр Лукашенкони инқирозли вазиятни юзага келтиришда айблади.
Изоҳ (0)