Латвия полицияси транспорт воситаларига “Мен русман” стикерлари каби “провокацион ёзувларни” ёпиштириб юришни номақбул амалиёт деб атади.
Twitter (Х) ижтимоий тармоғига жойланган Латвия давлат рақами ва “Мен русман” ёзуви туширилган автомобиль суратига полиция шундай жавоб берди.
Департаментнинг таъкидлашича, Украинадаги ҳозирги геосиёсий вазият ва узоқ давом этаётган урушни инобатга олган ҳолда, бундай стикерлар ҳарбий агрессияни мадҳ этувчи ёки Россия ҳарбий жиноятларини қўллаб-қувватловчи сифатида қабул қилиниши мумкин.
Латвия полицияси, агар бундай стикерлар аниқланса, автомобиль эгаларидан уларни зудлик билан олиб ташлашни талаб қилишини, шунингдек, ёзувларни жойлаштириш мақсади ва мотиви ҳақида тушунтириш олишни ваъда қилди. Ҳарбий агрессияни тарғиб қилганлик учун ҳайдовчилар жаримага тортилиши ҳам мумкин.
Латвияда Украина ҳудудида россиялик ҳарбий хизматчилар томонидан содир этилган уруш жиноятларини омма олдида оқлаш ва улуғлаш учун жиноий жавобгарлик назарда тутилган. Уруш тарафдори белгиларидан оммавий фойдаланиш, жумладан тегишли контекстда Z ва V белгилари — маъмурий ҳуқуқбузарлик сифатида жарима билан жазоланади.
2023 йил сентябрь ойида Латвия, Литва, Польша, Финляндия ва Эстония ўз ҳудудига Россия рақамларига эга автомобилларнинг киришини тақиқлади. Бу қарор Европа комиссиясининг тушунтиришлари асосида қабул қилинди. Латвия Адлия вазирлиги Россия ва Беларусь давлат рақамларига эга автомобилларни мусодара қилиш тўғрисидаги қонун лойиҳасини ҳам тайёрлади. Автомобильлар уч ой ичида мамлакатни тарк этмаса ёки Латвия юрисдикциясида қайта рўйхатдан ўтказилмаса, мусодара қилинади.