Литва Беларусь билан чегарадаги девор қурилишини якунлади, деб ёзади «РБК» лойиҳа ижрочиси EPSO-G компаниясига таяниб.
«Ўтган дам олиш кунлари EPSO-G томонидан тузилган пудратчилар жамоаси Беларусь билан чегарада тўсиқнинг сўнгги қисмларини ўрнатди», — деди компания вакили Антанас Бубнялис.
Тўсиқ ва тиканли сим жами қарийб 502 километр узунликдаги ҳудудга ўрнатилган.
Айни пайтда техник хизмат кўрсатиш мутахассислари девордаги майда нуқсонларни бартараф этмоқда. Шунингдек, йўллар ва қурилиш майдонлари қайта тикланмоқда, лойиҳа ҳужжатлари тегишли ҳолатга келтирилмоқда.
Литва бош вазири Ингрида Шимоните махсус комиссия қурилиш якунланганини тасдиқлаганини, фақат ташкилий ҳужжатлар билан боғлиқ ишлар қолганини айтди. Девор Беларусь билан чегарани деярли тўлиқ ёпса-да (чегаранинг жами узунлиги 679 км, шунинг 100 километрдан зиёди дарё ва кўллар қирғоқларидан ўтади), Шимоните тўсиқ давлатни ноқонуний миграциядан юз фоиз ҳимоя қилмаслигини тан олди.
Шимоните чегарада девор қилиш ниятини ўтган йил ёзида эълон қилган, бунга Яқин Шарқдан келган муҳожирлар Беларусь томондан ёпирилиб келиши сабаб бўлган эди. Ундан аввалроқ Беларусь президенти Александр Лукашенко Ryanair самолёти Минскка мажбурий қўндирилгани учун киритилган Европа санкцияларига жавобан, унинг мамлакати Евроиттифоққа ноқонуний муҳожирликка қарши курашда бошқа ёрдам бермаслигини айтганди. Шундан кейин Беларусь ҳудуди орқали Евроиттифоққа ўтмоқчи бўлган Яқин Шарқ мамлакатлари фуқаролари сони кескин ошиб кетди. Беларусь ва Евроиттифоқ чегарасидаги вазият ноябрда кескинлашди. Бир неча кунлик тўқнашувлар ҳамда Лукашенко ва Ангела Меркель ўртасидаги музокаралардан кейин муҳожирлар чегарадаги лагерларни тарк этди.
Латвия ва Польша ҳам Беларусдан ўзини тўсиқ билан ажратишга қарор қилди. Варшава июнь охирида баландлиги 5 метр ва узунлиги 186 км (бу Польша—Беларусь чегараси узунлигининг қарийб ярмига тенг) бўлган девор қурилишини якунлаганини маълум қилганди.
Изоҳ (0)