Болтиқбўйи мамлакатлари ҳисобланган Латвия ва Эстония Европада инсон ҳуқуқларини ҳимоя қилиш механизмларини қайта кўриб чиқишни талаб қилди. Сабаби ноқонуний миграциядан келиб чиқаётган таҳдидлар тобора ортиб бормоқда. Бу ҳақда Anadolu хабар берди.
Латвия бош вазири Эвика Силина ва Эстония бош вазири Кристжен Мичал томонидан ҳаммуаллифликда ёзилган мактубда тўққизта Европа мамлакати етакчилари Европа инсон ҳуқуқлари судининг (ЕИҲС) миграция сиёсатидаги ролини қайта кўриб чиқишни сўради. Мактуб матни Италия ҳукуматининг расмий веб-сайтида эълон қилинган.
Ҳужжатда таъкидланишича, ЕИҲСнинг замонавий талқинлари айрим ҳолатларда давлатларга жиддий жиноятларда айбдор деб топилган хорижий фуқароларни депортация қилишга тўсиқ бўлиб, бу фуқароларнинг давлат идоралари ва адлия тизимига бўлган ишончини заифлаштирмоқда.
“Мамлакатларимизнинг хавфсизлиги ва барқарорлиги бошқа барча омиллардан устун туриши лозим. Зўравонлик, гиёҳванд моддалар билан боғлиқ жиноятлар ва бошқа жиддий таҳдидларга самарали жавоб қайтара олишимиз зарур”, дейилади мактубда.
Етакчиларга кўра, урушдан кейинги Европада қабул қилинган халқаро нормалар бугунги кунда замонавий миграция оқимларининг ҳажмига тўлиқ жавоб бера олмаяпти. Мактубда жиноятчилар депортация қилинмай, жамият учун хавф солишни давом эттираётганига алоҳида эътибор қаратилган.
Мактуб Латвия, Эстония, Дания, Италия, Австрия, Бельгия, Чехия, Литва ва Польша етакчилари томонидан имзоланган.
Латвия бош вазири Эвика Силина миллий назоратни кучайтириш зарурлигини таъкидлаб, глобал муаммолар фонида Европада инсон ҳуқуқлари тизимининг келажаги ҳақида очиқ ва ҳалол мулоқот ўтказилиши кераклигини билдирди.
Мактубда, шунингдек, Европа Иттифоқи чегараларида миграцияни босим воситаси сифатида қўллаётган дўстона бўлмаган давлатларга қарши биргаликда курашиш чақириғи бор.
Изоҳ (0)