Шавкат Мирзиёев ва Хитой раиси Си Цзиньпин 17 июнь куни Қозоғистонда музокара ўтказиб, икки томонлама ва минтақавий аҳамиятга молик долзарб масалаларни кўриб чиқди.
Президент матбуот хизматининг хабар қилишича, давлат раҳбарлари кейинги йилларда Ўзбекистон билан Хитой ўртасидаги дўстлик ва барча шароитларда ҳар томонлама стратегик шериклик муносабатлари мисли кўрилмаган юксак даражага кўтарилганини қайд этди.
Камбағалликка қарши курашиш соҳасидаги ҳамкорликни янада чуқурлаштириш масалаларига алоҳида эътибор қаратилди. Етакчилар Хитой—Қирғизистон—Ўзбекистон стратегик темир йўли қурилишини жадаллаштириш муҳимлигини ҳам қайд этди. Таълим, фан, туризм ва маданият, кадрлар тайёрлаш ҳамда хитой тилини ўрганиш соҳаларидаги алмашинувларни ривожлантиришдан манфаатдорлик билдирилди.
-dlndNakS.avif)
Учрашувда халқаро кун тартиби юзасидан ҳам фикр алмашилди. БМТ, ШҲТ, “Марказий Осиё— Хитой” формати ва бошқа кўп томонлама тузилмалар доирасидаги мувофиқлашув ва ўзаро қўллаб-қувватлашни давом эттириш муҳимлиги қайд этилди.
Якунда етакчилар ҳузурида Ўзбекистоннинг ЖСТга аъзо бўлиши бўйича икки томонлама музокаралар якунлангани тўғрисида баённома имзолангани эълон қилинди.
Шавкат Мирзиёев Қозоғистон президенти Қасим-Жомарт Тўқаевнинг таклифига биноан “Марказий Осиё—Хитой” иккинчи саммитида иштирок этиш учун Олмаотага келганди. Бўлажак тадбирда кўп томонлама ҳамкорликни янада ривожлантиришга доир, шунингдек, минтақавий ва халқаро аҳамиятга молик долзарб масалалар кўриб чиқилади.
Ўзбекистон—Хитой муносабатлари
Ўзбекистон президентининг 2024 йил январь ойида Хитойга давлат ташрифи давомида эришилган келишувлар амалга оширилмоқда. Барча даражаларда алоқалар ва алмашинувлар сезиларли фаоллашган. Ташқи ишлар вазирларининг стратегик мулоқоти йўлга қўйилди. Жорий йил июнь ойи бошида Самарқанд шаҳрида иккинчи Ҳудудлар форуми муваффақиятли ўтказилди.
Савдо-иқтисодий ва молиявий-инвестицион ҳамкорлик ривожланмоқда. 2024 йилда товар айирбошлаш 14 миллиард долларга етди. Инвестиция лойиҳалари портфели 60 миллиард доллардан зиёдни ташкил этмоқда. Ўзбекистонда қўшма технопарклар ва махсус индустриал зоналар фаолият юритмоқда, BYD электромобилларини ишлаб чиқариш кенгаймоқда.
“Яшил” энергетика, нефть-газ, кимё, фармацевтика, металлургия, тоғ-кон, тўқимачилик, озиқ-овқат ва қурилиш тармоқларида ҳамда логистика, “ақлли” қишлоқ хўжалиги, сунъий интеллект ва рақамлаштириш соҳаларида истиқболли лойиҳалар ишлаб чиқилмоқда.
Хитойнинг етакчи молия институтлари билан ҳам ўзаро манфаатли ҳамкорлик йўлга қўйилган. “Ипак йўли” жамғармаси билан инвестиция платформасини кенгайтириш режалаштирилган. Хитой Эксимбанки иштирокида Тошкентда Олимпия шаҳарчаси қурилиши якунланмоқда. Тошкент шаҳрида ушбу банкнинг минтақавий филиали очилди.
Ўзбекистонда Хитойнинг Шимоли-ғарбий қишлоқ хўжалиги ва ўрмон хўжалиги университетининг филиали фаолият кўрсатмоқда, Урганч университети негизида Пекин университети билан ҳамкорликда Халқаро математика маркази ташкил этилган. Ўтган йили Конфусий институти фаолиятининг 20 йиллиги нишонланди, Хитойнинг Лу Бан устахонаси профессионал таълим тизими жорий этилмоқда.
Келгуси йилда икки мамлакатда маданият ва санъат ҳафталикларини ўтказиш режалаштирилган.
Изоҳ (0)