Эрондаги ҳозирги инқирозга барҳам бериш учун фақат битта ҳақиқий ечим мавжуд бўлиб, у ҳам бўлса ҳозирги режимни ағдаришда Эрон халқини қўллаб-қувватлаш. Бу ҳақда Эроннинг сўнгги валиаҳд шаҳзодаси Ризо Паҳлавий ўзининг Х ижтимоий тармоғидаги саҳифасида маълум қилди.
Унинг айтишича, Ислом Республикаси Эрон миллати бойликларини талон-торож қилиб, ўзининг махфий ҳамда хатарли ядро лойиҳаларига юз миллиардлаб доллар сарфлаган.
“Ислом Республикаси Эрон миллати бойликларини талон-тарож қилиб, халқнинг фаровонлиги, хавфсизлиги ва турмуш даражасини таъминлаш ўрнига, уранни бойитиш ва ўзининг махфий ҳамда хатарли ядро лойиҳаларига юз миллиардлаб доллар сарфлади. Оқибатда азиз Эронимизни уруш арафасига олиб келди. Бу тузум узоқ вақт дунёни алдашга уринди, аммо энди унинг асл моҳияти ва қиёфаси барчага аён бўлди. Ислом Республикасини жавобгарликка тортиш вақти етди”, дейди валиаҳд шаҳзода.
Паҳлавийнинг таъкидлашича, Эрон Паҳлавийлар даврида Ядро қуролини тарқатмаслик шартномасини имзолаган давлатлардан бири бўлган.
“Эрон Паҳлавийлар даврида Ядро қуролини тарқатмаслик шартномаси (ЯҚТШ)ни имзолаган дастлабки давлатлардан бири эди. Бироқ бугун Халқаро атом энергияси агентлиги Ислом Республикаси шартномани бузаётганини эълон қилди. Ушбу ҳужжатлаштирилган фош этишга жавобан, Хоманаий ва унинг жинояткор тўдаси янги бойитиш иншоотлари қураётганини безбетларча маълум қилди.
Бу хатти-ҳаракатлар, яъни ЯҚТШни мунтазам бузишдан тортиб ундан чиқиш таҳдидларигача, Ислом Республикаси режими ишончга сазовор эмаслигини ва музокаралар иштирокчиси бўла олмаслигини яна бир бор исботлади. Бу режим билан ҳар қандай алоқа фақат уни кучайтиради”, дейди Ризо Паҳлавий.
Шаҳзода Эрон халқини Республика режимига максимал босим ўтказишга чақирган.
“Аммо бу ғайриқонуний режимга қарши ҳақиқий ва умидли муқобил куч мавжуд - бу Эрон халқидир. Қўрқувдан холи тинч ва дунё билан самарали ҳамкорликка асосланган келажакни орзу қилаётган халқ.
Энди тинчлик учун бир-бирини тўлдирувчи икки ҳаракатни амалга ошириш вақти келди: биринчидан, Ислом Республикаси режимига максимал босим ўтказиш, жумладан БМТ Хавфсизлик Кенгашининг қарорлари ва санкцияларини тиклаш мақсадида “ишга тушириш механизми”ни фаоллаштириш; иккинчидан эса, ўз мамлакатининг озодлиги ва қайтарилиши учун мардона ва қатъият билан курашаётган, режимнинг энг ашаддий душмани бўлган Эрон халқига имкон қадар кўпроқ ёрдам кўрсатиш”, дейди Эроннинг сўнгги шаҳзодаси.
Ризо Паҳлавий 1967 йилдан бери Эроннинг валиаҳд шаҳзодаси бўлиб, отаси Муҳаммад Ризо Паҳлавийдан сўнг тахтни эгаллаши лозим эди, бироқ 1979 йилдаги Эрон Ислом инқилоби туфайли оиласи билан бирга Эрондан қочишга мажбур бўлган.
У ҳозирги Эрондаги мавжуд бўлган руҳонийлар бошқараётган ислом республикасининг асосий танқидчиларидан бири ҳисобланади. Эронда тақиқланган Эрон Миллий Кенгашининг асосчиси ва раҳбари саналади. Айни пайтда АҚШнинг Лос-Анжелес шаҳрида истиқомат қилмоқда.
Изоҳ (0)