Исроилнинг Эронга қарши ҳарбий операцияси 2024 йил ноябрь ойиданоқ режалаштирилиб, дастлаб апрель ойи охирига белгиланган эди. Бу ҳақда Исроил бош вазири Биньямин Нетаньяху маълум қилди.
“Аслида мен бу буйруқни мудофаа тузилмалари раҳбариятига олти ойдан ортиқ вақт олдин, 24 ноябрь куни берганман. У ҳозир менинг қўлимда”, деди у ҳукумат раҳбари девонхонаси тарқатган видеомурожаатда.
Шу билан бирга, Нетаньяху А4 форматдаги қоғозда ёзилган ҳужжатни кўрсатган.
“Бу Эроннинг ядро дастурини амалда тугатиш тўғрисидаги буйруқдир”, дея изоҳ берди у.
Нетаньяхунинг қўшимча қилишича, ушбу операцияга тайёргарликни бошлаш тўғрисидаги қарор 2024 йил сентябрь ойида Ливанда Исроил армияси кучлари томонидан “Ҳизбуллоҳ”партияси бош котиби Ҳасан Насруллоҳ бошчилигидаги раҳбарияти йўқ қилинганидан кўп ўтмай қабул қилинган. Бош вазирнинг таъкидлашича, дастлаб Эронга зарбалар жорий йилнинг апрель ойи охирида берилиши режалаштирилган эди. Бироқ белгиланган муддатда “турли сабаблар туфайли” операция бошланмаган. Бу сабабларни аниқ кўрсатмаган ҳолда, у зарбалар бошланишининг якуний санаси ҳарбий раҳбарият билан маслаҳатлашувлардан сўнг белгиланганини қўшимча қилди. Нетаньяху яна бир бор операциянинг асосий мақсади Эроннинг ядро ва ракета дастурларини йўқ қилиш эканлигини таъкидлади, чунки Исроил уларда ўз мавжудлигига таҳдид кўрмоқда.
“Бу иккита ҳаётий таҳдиддир ва биз энди кутиб бўлмаслигига қарор қилдик”, дея изоҳ берди у.
13 июнга ўтар кечаси Исроил қўшинлари Эронга қарши ҳарбий операция бошлаб, Ислом Республикасининг бир неча аҳоли пунктларидаги объектларга зарбалар берди. Жумладан, Теҳрондаги Ислом инқилоби қўриқчилари корпуси (ИIQК) штаб-квартираси ҳам нишонга олинган.
Кейинроқ Эрон Атом энергияси ташкилоти (ИАЭТ) раҳбари Муҳаммад Эсломий Исроил ҳужумлари натижасида Натанздаги ядровий объектга жиддий зарар етмаганини маълум қилди.
Изоҳ (0)