Дунёнинг турли бурчакларидан минглаб фаоллар 12 июнь куни Мисрга етиб келган. Улар Исроилнинг Ғазо блокадасини бузишни мақсад қилган. Бу ҳақда CNN хабар берди.
Бу ҳаракат “Ғазога глобал юриш” деб номланган. Унга 80 дан ортиқ мамлакатдан 4 мингга яқин кўнгиллилар қўшилганини ташкилотчилар маълум қилган. Улар дастлаб Қоҳирага қўнади, сўнг автобусларда Синай шимолидаги Ариш шаҳрига боради. Кейин чўл яримороли орқали тахминан 30 мил масофани босиб ўтиб, Рафаҳдаги Ғазо чегарасининг Миср томонига етиб бориши айтилган.
Фаоллар маршрут бўйлаб чодирларда ухлайди ва манзилга 13 июнь етиб келиши кутилмоқда. Аммо урушдан вайрон бўлган анклавга кириш режалаштирилмаган.
Бу ҳаракат Мисрни ноқулай аҳволга солиб қўяди, чунки у Исроил ва АҚШ билан алоқаларини мувозанатда ушлашга ҳаракат қилмоқда. У Исроилнинг хатти-ҳаракатларидан ғазаб кучайиб бораётган бўлса ҳам, Рафаҳ ўтиш жойининг ўз томонини фаластинликлар учун ёпиқ сақлаб турган эди.
Исроил мудофаа вазири Исраэл Кац 11 июнь куни берган баёнотида Миср ҳукуматидан “жиҳодчи намойишчиларнинг Миср-Исроил чегарасига келишига йўл қўймаслик ва уларга провокациялар уюштириш ҳамда Ғазога киришга уринишларига йўл қўймаслик“ни кутаётганини айтганди.
Халқаро фаоллар сафига Тунисдан келган яна 2 минг кишилик намойишчилар карвони ҳам қўшилади. Унинг 11 июнь куни Мисрга қўшни бўлган Ливияга етиб келгани айтилган.
Маршга қўшилаётганлар орасида Жанубий Африканинг собиқ қонун чиқарувчиси, Нелсон Манделанинг набираси Нкоси Звеливелиле Мандела ва АҚШ Давлат департаментининг собиқ дипломати, Байден маъмурияти даврида Вашингтоннинг Ғазодаги урушни ҳал қилгани учун АҚШ ҳукуматидаги лавозимидан истеъфога чиққан Хала Рхаррит бор.
Изоҳ (0)