Эрон пойтахтида минглаб аҳоли кўчаларга чиқиб, мамлакат раҳбариятидан Исроилнинг бугунги ҳужумларига жавоб беришни талаб қилди. Бу ҳақда жаҳон оммавий ахборот воситалари хабар бермоқда.
Маълум қилишича, минглаб эронликлар Теҳрон ва мамлакатнинг бошқа шаҳарларида кўчаларга чиққан. Улар қўлларида ўз давлат байроқларини кўтариб, Исроилга қарши шиорлар айтишди ҳамда ҳукуматдан ЦАХАЛ ҳаракатларига қатъий жавоб беришни талаб қилишди. Теҳронда намойишчилар Энқелоб майдонида тўпланишди.
Акцияда бутун оилалар иштирок этган. Митингдан сўнг намойишчилар Теҳрон университети томон йўл олишган. Университетнинг майдонида анъанага кўра жума намози ўқилган. Йўл давомида улар Исроилга қарши шиорларни ҳам айтиб боришди. Шу билан бирга, уларга янги иштирокчилар қўшилган.
Намойишчиларнинг ҳукуматга қўйган асосий талаби — ЦАХАЛ ҳужумларига жавобан Исроилга “кучли зарбалар” бериш. Маҳаллий оммавий ахборот воситаларининг хабар беришича, бутун мамлакат бўйлаб ўз-ўзидан норозилик намойишлари юзага келмоқда.
Исроил мудофаа армияси (ЦАХАЛ) жума кунига ўтар кечаси кенг кўламли ҳарбий операцияни бошлади. Операция доирасида ҳаво кучлари Эроннинг ҳарбий нишонлари ва ядро дастури объектларига зарбалар бермоқда. Теҳрондаги ҳужумлар пайтида Эроннинг баъзи юқори мартабали ҳарбийлари ва бир қатор ядро соҳасидаги олимлари йўқ қилинди. Шунингдек, мамлакатнинг шимоли-ғарбидаги Натанз шаҳридаги ядро объектига ва эронлик ҳарбийлар жойлашган ҳудудларга ҳам зарбалар берилди.
Исроил расмийларининг таъкидлашича, операция яҳудий давлатининг мавжудлигига бўлган таҳдиднинг олдини олишга қаратилган. Чунки разведка маълумотларига кўра, Эрон ядро қуролини яратишда “қайтиб бўлмас нуқта”га яқинлашган. Эрон олий раҳбари оятуллоҳ Али Хоманаий мамлакат фуқароларига йўллаган мурожаатида ЦАХАЛ зарбаларини жиноят деб атади ва Исроилни "аччиқ ва даҳшатли тақдир” кутаётганини қўшимча қилган.
Изоҳ (0)