АҚШ президенти Жо Байден Яқин Шарқдаги вазият янада авж олишига йўл қўймаслик мақсадида Исроилга Эронга жавоб қайтаришдан тийилишни тавсия қилди. Бу ҳақда америкалик расмий манбаларга таяниб, Тhе New York Times ёзмоқда.
Манбаларга кўра, Эроннинг 300 дан ортиқ дрон ва ракеталарининг деярли барчаси уриб туширилиши Исроил ўзини ҳимоя қилиш қобилиятини исботлаганини кўрсатди, яъни “ўт очиш шарт эмас”. Бу фактнинг ўзи “катта стратегик ғалаба”ни ифодалайди, дейди АҚШ расмийлари.
“Исроил бундай мисли кўрилмаган ҳужумлардан ҳимояланишнинг ҳайратланарли қобилиятини намойиш қилиб, душманларига Исроил хавфсизлигига таҳдид сола олмаслиги ҳақида аниқ сигнал берди”, — деган Байден Исроил бош вазири Биньямин Нетаньяху билан суҳбатда.
Бироқ, нашрнинг ёзишича, қарор чиқариш Исроил қўлида. Ҳужум кўлами сўнгги йилларда мамлакатлар ўртасида олиб борилаётган “соядаги уруш” доирасидан анча узоқлашган.
Эрон ҳужуми пайтида баъзи америкалик сиёсатчилар президент ва Исроил ҳукуматини кенг кўламли жавоб зарбасини беришга чақирган. Шу билан бирга, Американинг CNN нашри Исроил ҳукумати Эрон ҳужумига жавоб қайтаришни режалаштираётганини ёзмоқда. Жавоб операциясининг кўлами ҳозирча номаълум.
Ynet маълумотларига кўра, эҳтимолий сценарийлардан бири Эрон ядровий иншоотларига “зарар келтириши” мумкин. Ҳозир исроиллик ҳарбийлар ва сиёсатчилар кескинлашувга олиб келмайдиган жавоб чораларини ишлаб чиқишга ҳаракат қилмоқда, деди нашр манбалари.
Изоҳ (0)