Ижтимоий тармоқларда Самарқанд вилоятининг Ургут туманида мансабдор шахс томонидан экишни хоҳламаганларнинг ери хитойликларга берилиши айтилган видеолари тарқалди. Ҳолат юзасидан Қишлоқ хўжалиги вазирлиги изоҳ берди.
Вазирлик муносабатида “Фермер хўжалиги тўғрисида”ги қонуннинг 3-моддаси эслатиб ўтилди. Унга мувофиқ, фермер хўжалиги — бу ижара асосида ер участкаларидан фойдаланиб, қишлоқ хўжалиги маҳсулотлари етиштирувчи ва қонун билан тақиқланмаган бошқа фаолият турлари билан шуғулланувчи тадбиркорлик субъекти ҳисобланади. Шунингдек, мазкур қонуннинг 22-моддасида фермер хўжаликлари фаолиятига давлат органлари, бошқа ташкилотлар ёки уларнинг мансабдор шахслари томонидан аралашиш тақиқлангани қатъий белгилаб қўйилган.
Вазирлик Ер кодексининг 24-моддасини ҳам келтирган. Унга асосан, ер участкасини ижарага бериш шартномасини муддатидан олдин бекор қилиш фақат тарафлар ўзаро келишуви асосида ёки суд қароридан келиб чиқиб амалга оширилиши мумкин.
“Демак, ҳар қандай ташқи босим, таҳдид ёки мажбурлаш орқали фермерларни ердан маҳрум қилишга уриниш — амалдаги қонунчиликка мутлақо зиддир”, дейилади хабарда.
Шу билан бирга, Ер кодексининг 16-моддаси ҳам кўрсатилди. Хусусан, ушбу моддага мувофиқ, Ўзбекистон ҳудудидаги ерлар давлат мулки ҳисобланади. Ер билан боғлиқ мулкий муносабатлар қатъий тартибга солинган бўлиб, хорижий фуқаролар ёки юридик шахсларга ерни мулк ҳуқуқи асосида бериш тақиқланган.
“Шу боис хитойлик фуқаролар ёки компанияларга ер ажратилиши ҳақидаги баёнотлар асоссиз, қонунга зид ва ҳақиқатга тўғри келмайди.
Юқоридаги ҳолатлардан келиб чиқиб, видеомурожаатда баён этилган айрим гап-сўзлар Қишлоқ хўжалиги вазирлигининг сиёсат ва принципларига, шунингдек, мамлакатимиз қонунчилигига зид бўлиб, мазкур ҳолат юзасидан тегишли идоралар томонидан ҳуқуқий баҳо бериш чоралари кўрилмоқда”, дея қўшимча қилинади муносабатда.
Вазирлик барча фермер хўжаликлари, агрофирма ва агрокластерлар учун тинч, барқарор ва қонуний фаолият юритиш имконини таъминлаш, уларнинг ҳуқуқ ва манфаатларини ҳимоя қилиш, адолатли ва тенг муносабатда бўлиш тамойилларига қатъий содиқлигини таъкидлаган.
“Инвестиция жалб этиш ва замонавий агротехнологияларни жорий этиш — бу албатта муҳим вазифалардандир. Бироқ бу жараёнлар фақат ихтиёрийлик, қонунийлик ва тенглик тамойиллари асосида амалга оширилиши шарт.
Шу муносабат билан барча фермер ва тадбиркорларни ўз ҳуқуқ ва манфаатларини билишга, ноқонуний аралашувларга қарши қонуний чоралар кўришга чақирамиз. Бундай ҳолатлар юз берганда, Қишлоқ хўжалиги вазирлигига ёки прокуратура органларига мурожаат этишингизни сўраймиз”, дейилади хабарда.
Изоҳ (0)