Дунёдаги энг бой инсон Жефф Безос ва Лорен Санчеснинг никоҳ маросими бўлиб ўтиши кутилаётган 5 ҳашаматли меҳмонхона

Жефф Безос ва Лорен Санчес июнь ойининг охирида тўйини нишонлашади. Байрам тўлиқ 3 кун — 24 июндан 26 июнгача ўтказилиши режалаштирилган. Бу оламшумул воқеа Венецияда ўтказилади, никоҳ Сан Жоржио Мажоре оролидаги Авлиё Георгий черковида бўлиб ўтади.

Тўйнинг миқёси жуда катта бўлиши айтилмоқда. Бу ҳақдаги миш-мишлар маҳаллий аҳолининг ғазабини қўзғатди — улар бой меҳмонларнинг кескин оқими шаҳарда ҳаракатланиш билан боғлиқ муаммоларни келтириб чиқаришидан қўрқмоқда. Натижада фаоллар ҳатто Венеция марказида намойишлар уюштиришни режалаштирмоқда.

“Венецияда маҳаллий аҳолидан тортиб тадбиркорлар, талабалар ва оилаларгача бу воқеани муҳокама қилмоқда ва айниқса, ҳозирда коррупция иши бўйича тергов қилинаётган мер Луижи Бруняро бошчилигидаги маъмуриятимизга нисбатан норозилик кенг тарқалган. У шаҳарни ўзининг шахсий манфаатлари билан боғлиқ инвесторларга сотди, энди эса худди шундай тарзда уни Безосга сотмоқда”, дейди намойишчилардан бири.

Шунга қарамай, Безос ва Санчес дастлабки режаларидан воз кечмоқчи эмас. Жуфтликка яқин манбаларнинг маълум қилишича, айни дамда улар ўз тўйига 200 га яқин кишини таклиф қилишган. Улар орасида Ким Кардашьян, Опра Уинфри, Леонардо Ди Каприо, Орландо Блум ва унинг рафиқаси Кети Перри, Иванка Трамп ва унинг турмуш ўртоғи Жаред Кушнер, шунингдек, АҚШ президенти ва биринчи хоними Дональд ва Мелания Трамплар ҳам бор.

Вип-меҳмонлар билан зиёфатлар ўтказиш учун Жефф Безос Венециянинг энг яхши 5 та меҳмонхонаси — The Aman Venice, Danieli, Belmond Hotel Cipriani, St. Regis Venice ва Gritti саройини танлади. Миллиардер ўз тўйини қандай интерерларда нишонлашни режалаштираётганини қуйида кўришингиз мумкин.

Aman Canal Grand меҳмонхонаси

Безос ижарага олган биринчи жой — Aman Venice меҳмонхонаси. У XVI асрда сақланиб қолган Венеция саройларидан бирида жойлашган. Сўнгги Уйғониш даври услубидаги маҳобатли бино шаҳарнинг асосий диққатга сазовор жойларидан бири бўлган Гранд каналида қад ростлаган.

Унинг интерери кўп жиҳатдан палацсонинг асл кўринишини сақлаб қолган. Меҳмонхонанинг ичкариси нақшлар, мармар зинапоялар ва ёғоч шифтлар билан безатилган.

Меҳмонхона сайтида айтилишича, йилнинг иссиқ мавсумида кечки овқат ва зиёфатлар учун Венециянинг марказий қисмидаги камдан кам учрайдиган хусусий яшил ҳудудлардан бири — канал бўйидаги боғдан фойдаланилади.

Безос ва Санчеснинг меҳмонлари учун палацсо заллари ва Аrvа ресторани ҳам мавжуд бўлиб, у ерда мавсумий меню асосида таомлар тортилади. Кечки овқатни асосий залда ҳам, алоҳида шахсий хоналарда ҳам ташкил этиш мумкин бўлади.

Бундан ташқари, меҳмонхона вакилларининг таъкидлашича, Aman Veniceʼнинг бутун ҳудуди сайёҳлар оқимидан изоляция қилинган ва юқори даражадаги махфийликни таъминлайди, демак, келин-куёв ва унинг дўстларини тантана пайтида бегоналар безовта қилмайди.

Danieli

Danieli меҳмонхонаси Сан Марко майдони яқинида жойлашган. У Жефф Безос тўйи учун брон қилган меҳмонхоналар орасида энг каттаси бўлиб, у ер бир вақтнинг ўзида учта тарихий бинони эгаллайди. Асосийси — XIV асрда Венеция дожлари оиласига тегишли бўлган Дандоло саройидир. Қолган икки бино ХIX ва ХХ асрларда қурилган бўлиб, ягона меҳмонхона мажмуасига бирлаштирилган.

Меҳмонхона хоналари Венеция готикаси ва барокко услубида безатилган бўлиб, унинг ичида асл зинапоялар, витражлар ва антиқа буюмлар тўпламлари сақланиб қолинган.

Тадбирлар учун кўрфазга қараган панорамали кўринишга эга Terrazza Danieli ресторани, шунингдек, саройнинг ички заллари мавжуд — эҳтимол, Санчес ва Безос ўзларининг тўй кечасини айнан шу жойлардан бирида ўтказишади.

Шунингдек, меҳмонхона ҳудудидан бандаргоҳга тўғридан тўғри чиқиш йўли мавжуд бўлиб, у ердан сув таксиси ёки гондолада шаҳар бўйлаб саёҳат қилиш мумкин.

Belmond Cipriani

Безоснинг учинчи тўй меҳмонхонаси Belmond Cipriani Жудекка оролида жойлашган. У меҳмонларга Венециянинг тарихий маркази — дожлар саройи ва Сан Жоржо Мажоре ороли бўйлаб 270 даражали кўринишни тақдим этади.

Ушбу меҳмонхонанинг асосий хусусияти шундаки, у ерда шаҳарда очиқ осмон остида жойлашган ягона олимпия бассейни мавжуд. Belmond Hotel Cipriani сайтида айтилишича, унинг ҳажми бахтли тасодифдир. Мажмуани яратишда қурувчилар фут ва метрларни чалкаштириб юборишган, натижада улар ақл бовар қилмайдиган даражада улкан бассейн қуришган.

Айтганча, бассейн атрофи тадбирлар ўтказиладиган жой сифатида ишлатилади — бу зиёфатни ўтказиш учун зарур бўлган нарса.

Бундан ташқари, меҳмонхонада бир нечта ресторанлар мавжуд бўлиб, улардан бири Мишлен юлдузи билан ажралиб туради. Шунингдек, Безос ва Санчеснинг меҳмонлари ихтиёрида хусусий пристан, теннис корти, соғломлаштириш маркази, болалар клуби ва Венеция кўрфазининг чекка ҳудудлари бўйлаб экскурсия дастурлари бўлади.

Gritti саройи

Жефф Безоснинг танловида Gritti саройи ҳам бор. Дастлаб у таниқли Венеция зодагонларидан бири Пиза оиласига тегишли бўлган ва кейинчалик дож Андреа Гриттининг мулкига ўтган. ХIX асрда сарой меҳмонхонага айлантирилган.

Гритти саройи ёпиқ тадбирлар учун бир нечта жойларни таклиф қилади. Улар орасида каналга, Санта Мария Делла Салют черковига ва лагуна оролларига қараган 250 метр квадрат майдонли Реденторе люкс террасаси энг нуфузли ҳисобланади.

Бундан ташқари, меҳмонхонада Gritti террасаси ва сарой ичидаги тарихий заллар мавжуд бўлиб, у ерда зиёфатлар, фуршетлар ва хусусий тушликлар ўтказилади. Меҳмонхонадан кичик тўйлар, тақдимотлар ўтказиш учун фаол фойдаланилади, Венеция кинофестивали пайтида эса унда А-лист (Голливудда А-лист деб аталадиган актёрлар рўйхати мавжуд. Унда суперюлдуз мақомига эгалиги ҳеч кимда шубҳа уйғотмайдиган кино саноати вакиллари бор. Леонардо Ди Каприо ва Бред Питт, Марго Робби ва Эмма Стоун шулар жумласидандир) юлдузлари тўхтайди.

St. Regis

Жефф Безос ижарага олган энг сўнгги меҳмонхона St. Regis Veniceʼдир. У шаҳар марказида, Гранд канали бўйида жойлашган. Тарихий архитектурасига қарамай, ичкарида меҳмонларни замонавий дизайн кутмоқда.

Меҳмонхонанинг асосий майдонларидан бири машҳур Гинори 1735 чинни уйи билан ҳамкорликда безатилган Гинори террасаси ҳисобланади. Сайтда айтилишича, у очиқ ҳавода ўтказиладиган тадбирлар ва ҳатто кичик концертлар учун ҳам мос. Шунингдек, меҳмонхона биносидан Санта Мария Делла Салют базиликаси, Академия кўприги ва кўрфазнинг тўғридан тўғри кўриниши мавжуд.

Бундан ташқари, St. Regis замонавий санъат коллекцияси билан машҳур — унда Jaume Plens, Lorenzo Quinn ва бошқа рассомларнинг асарларини кўриш мумкин.