Ўзбекистонда сув хўжалиги соҳасидаги ҳуқуқбузарликлар тўғрисидаги фото ва видео юборган шахслар рағбатлантирилади.
Ҳукуматнинг 7 июндаги қарори билан “Жисмоний шахслар томонидан қайд этилган сув хўжалиги соҳасидаги ҳуқуқбузарликлар тўғрисидаги фотосуратлар ва (ёки) видеоёзувларни қабул қилиш, кўриб чиқиш ҳамда уларни тақдим этган шахсларни рағбатлантириш тартиби ҳақида”ги низом тасдиқланди.
Низом Маъмурий жавобгарлик тўғрисидаги кодекс 74-моддасининг 2-қисмида назарда тутилган маъмурий ҳуқуқбузарликларга нисбатан татбиқ этилади. Ушбу моддада сунъий сув оқимлари (очиқ ва ёпиқ каналлар, коллектор-дренаж тармоқлари), сув ҳавзалари (сув омборлари, сел сувлари тўпланадиган жойлар, ҳовузлар ва бошқалар) ҳамда бошқа сунъий сув объектларидан олинадиган сувдан фойдаланиш ва сув истеъмоли қоидаларини бузиш, яъни сувдан хўжасизларча фойдаланиш, сувларнинг ва сув объектларининг ҳолатига таъсир этувчи гидротехника ишларини ва бошқа ишларни ўзбошимчалик билан бажариш, сув объектларидан белгиланган сув олиш лимитлари, сувдан фойдаланиш ва сув истеъмоли режаларини бузиш фуқароларга БҲМнинг бир бараваридан 3 бараваригача, мансабдор шахсларга эса — 5 бараваридан 10 бараваригача миқдорда жарима солишга сабаб бўлиши белгиланган.
Шахслар ҳуқуқбузарликни видеотехника воситалари орқали қайд этиб, 48 соатда Сув хўжалиги вазирлиги ҳузуридаги Сув хўжалиги объектлари хавфсизлигини ва сувдан фойдаланишни назорат қилиш инспекциясига v-nadzor.gov.uz сайти орқали юборади.
Фото ва видеоматериалларда қуйидагилар акс эттирилиши лозим:
- содир этилган ҳуқуқбузарлик;
- ҳуқуқбузарлик содир этган шахс тўғрисидаги маълумотлар (агар мавжуд бўлса);
- ҳуқуқбузарлик содир этилган манзил, аниқланган сана ва вақт.
Қоида тариқасида, фото ва видеоматериалларнинг давомийлиги 120 сониядан ошмаслиги лозим. Фото ва видеоматериаллар 10 кун муддатда инспекциянинг масъул ходими томонидан кўриб чиқилади.
Ҳуқуқбузарлик 1-маротаба содир этилган бўлса, ҳуқуқбузарга сувдан фойдаланиш ва сув истеъмоли тартиби (қоидалари) такроран бузилишининг олдини олишга қаратилган тавсиялар юборилади. Маъмурий жазо чораси қўлланганидан кейин 1 йил давомида ҳуқуқбузарлик такроран содир этилган тақдирда, Маъмурий жавобгарлик тўғрисидаги кодексининг тегишли моддаларида назарда тутилган миқдорларда жарима солишга сабаб бўлади.
Фото ва видеоматериалларни юборган шахслар ҳуқуқбузардан ундирилган жарима ҳисобидан БҲМнинг 25 фоизи миқдорида пул мукофоти билан рағбатлантирилади. Рағбатлантириш жарима ундирилган кундан бошлаб 15 кун муддатда амалга оширилади.
Ўзбекистонда сув хўжалиги соҳасида ҳуқуқбузарлик ҳолати ҳақида хабар берганлар рағбатлантириш кўзда тутилаётгани ҳақида 2024 йилнинг июлида маълум бўлганди.
Ҳозирда Ўзбекистонда ернинг ўзбошимчалик билан эгаллаб олиниши ҳақида хабар берган, дарахтларни ноқонуний кесиш ҳолатларини фото ва видеотасвирга олиб жўнатган фуқаролар рағбатлантирилади. Шунингдек, электр ва газдан фойдаланиш қоидабузарликлари ҳақида, ер қаъридан фойдаланиш қоидабузарликлари ҳақида хабар берганлар рағбатлантирилади.
Изоҳ (0)