Шавкат Мирзиёев 24 июль куни Россия президенти Владимир Путин билан телефон орқали мулоқот қилди. Бу ҳақда Президент матбуот хизмати хабар берди.
Қайд этилишича, суҳбат аввалида Россия етакчиси Ўзбекистон раҳбарини таваллуд куни билан табриклаган.
Шунингдек, Владимир Путин куни кеча Шавкат Мирзиёевни дўстлик ва икки томонлама ҳамкорликни мустаҳкалмашдаги катта хизматлари учун Александр Невский ордени билан мукофотлаш тўғрисида фармон имзолангани ҳақида хабар берган. Ўзбекистон раҳбари Россия етакчисига Ўзбекистон—Россия стратегик шериклик ва иттифоқчилик муносабатларининг бугунги даражасиг юксак баҳо бергани ва уларни янада мустаҳкамлаш масалаларини ҳар томонлама қўллаб-қувватлагани учун миннатдорлик билдирган.
Икки давлат етакчилари 2022 йилнинг сентябрь ойида Самарқанд шаҳрида ўтказиладиган Шанхай ҳамкорлик ташкилоти Давлат раҳбарлари кенгашининг навбатдаги йиғилишига тайёргарлик масалалари юзасидан фикр алмашган.
Бундан ташқари, шу куни Шавкат Мирзиёев Беларусь президенти Александр Лукашенко билан ҳам телефон орқали мулоқот қилган. Беларусь етакчиси ҳам Ўзбекистон раҳбарини таваллуд куни билан табриклаб, Ўзбекистон халқига фаровонлик ва равнақ тилаган.
Суҳбат давомида президентлар кейинги йилларда кўп қиррали Ўзбекистон—Беларусь муосабатлари жадал ривожланиб, аниқ мазмун билан бойиб бораётганини мамнуният билан қайд этган.
Изоҳ (0)