Ўзбекистон президенти Шавкат Мирзиёев бугун, 24 июль куни 66 ёшга тўлди. Шу муносабат билан давлат раҳбари қўшни ҳамда ҳамкор давлатлар президентларидан табрикларни қабул қилмоқда.
Хусусан, Туркманистон президенти Сердар Бердимуҳамедов билан 24 июль куни ўтказилган телефон орқали мулоқотида Ўзбекистон—Туркманистон амалий ҳамкорлигини янада ривожлантириш масалалари муҳокама қилинган. Туркманистон президенти Ўзбекистон раҳбарини таваллуд куни билан дилдан қутлаб, унга мустаҳкам соғлик ва катта муваффақиятлар, қардош Ўзбекистон халқига фаровонлик ва равнақ тилади.
Шунингдек, суҳбат давомида “Шовот—Тошовуз” чегараолди эркин савдо зонасини барпо этиш бўйича биргаликдаги ишларнинг илк натижалари катта мамнуният билан қайд этилди.
Тожикистон президенти Эмомали Раҳмон билан бўлиб ўтган телефон мулоқотида ҳам қўшни давлат раҳбари Шавкат Мирзиёевни туғилган куни билан самимий табриклади.
Ўзаро мулоқот давомида бўлажак олий даражадаги тадбирларга тайёргарлик кўриш ҳамда икки томонлама муносабатлар кун тартибини аниқ амалий мазмун билан бойитиш масалалари муҳокама қилинди.
Етакчилар ишбилармонлик ва гуманитар алоқаларни янада фаоллаштириш, жумладан, қўшма кўргазма ва ярмаркалар ўтказиш, ёшларни кенг жалб қилган ҳолда маданий ва спорт тадбирларини уюштириш муҳимлиги ҳақида якдил фикр билдирган. Минтақавий шериклик, шу жумладан Марказий Осиё давлатлари раҳбарларининг мунтазам маслаҳат учрашувлари ва Оролни қутқариш халқаро фонди доирасидаги ҳамкорликка оид масалалар ҳам кўриб чиқилди.
Шавкат Мирзиёев Қирғизистон президенти Садир Жапаров билан ҳам телефон орқали мулоқот қилди. Қирғизистон етакчиси Ўзбекистон раҳбарини таваллуд куни билан самимий табриклаб, тинчлик-осойишталик, равнақ ва барқарор тараққиёт тилади.
Суҳбатда Ўзбекистон билан Қирғизистон ўртасидаги яхши қўшничилик ва кенг қамровли стратегик шериклик муносабатларини янада мустаҳкамлашнинг долзарб масалалари кўриб чиқилди. Ҳукуматлараро комиссия фаолияти доирасида янги савдо ва инвестиция лойиҳалари тўпламини тайёрлашга алоҳида эътибор қаратилган. Ўзбекистон ва Қирғизистон етакчилари бўлажак олий даражадаги тадбирлар режасини ҳам кўриб чиқди.
Қозоғистон президенти Қасим-Жўмарт Тўқаев билан бўлиб ўтган телефон мулоқотида Қозоғистон етакчиси Шавкат Мирзиёевни таваллуд куни билан самимий табриклаб, мустаҳкам соғлик, фаровонлик ва янги муваффақиятлар, қардош Ўзбекистон халқига тинчлик-осойишталик ва равнақ тилади.
Етакчилар яхши қўшничилик, стратегик шериклик ва иттифоқчилик муносабатларини янада кенгайтириш ва мустаҳкамлаш масалаларини атрофлича кўриб чиқди. Ҳукуматлараро комиссиянинг Тошкент шаҳрида ва қўшма Ишчи гуруҳнинг Остона шаҳрида ўтган навбатдаги йиғилишларининг самарали натижалари мамнуният билан қайд этилди.
Шавкат Мирзиёев ва Озарбойжон президенти Илҳом Алиевнинг 24 июль куни ўтган телефон орқали мулоқотида икки томонлама ҳамкорликни янада ривожлантириш, кооперация лойиҳаларини илгари суриш ва ўзаро савдони кўпайтириш масалалари диққат марказида бўлди.
Озарбойжон етакчиси давлатимиз раҳбарини таваллуд куни билан дилдан қутлаб, мустаҳкам соғлик ва катта муваффақиятлар, кўп миллатли Ўзбекистон халқига тинчлик-осойишталик, фаровонлик ва равнақ тилади.
Ўзбекистон Республикаси ҳукумат делегацияси ўтган ҳафта Озарбойжонга амалга оширган ташрифнинг самарали якунлари ҳамда қўшма Ҳукуматлараро комиссиянинг Шуша шаҳрида ўтказилган навбатдаги йиғилиши натижалари мамнуният билан қайд этилди. Бўлажак олий даражадаги саммитга қадар қатъий келишув ва битимлар тўпламини шакллантириш муҳимлиги таъкидланди.
Бундан ташқари, Шавкат Мирзиёевнинг Россия президенти Владимир Путин билан 24 июль куни бўлиб ўтган телефон орқали мулоқотида икки томонлама муносабатлар кун тартибидаги долзарб масалалар муҳокама қилинди.
Суҳбат аввалида Россия етакчиси давлат раҳбарини таваллуд куни билан самимий табриклаб, унга мустаҳкам соғлик, бахт-саодат, Ўзбекистоннинг барқарор тараққиёти ва равнақи йўлидаги фаолиятида муваффақиятлар тилади.
Давлат раҳбарлари ўзаро манфаатли савдо-иқтисодий ва инвестициявий ҳамкорликни янада кенгайтириш, товар айирбошлаш суръатини таъминлаш ва саноат кооперацияси бўйича муҳим лойиҳаларни илгари суриш масалаларини муҳокама қилди. Минтақавий кун тартибидаги долзарб масалалар юзасидан фикр алмашилди.
Олдинроқ Туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедов билан телефон орқали мулоқот қилгани тўғрисида хабар берилганди.
Изоҳ (0)