Россиянинг амалдаги раҳбари Владимир Путин президентлик сайловида овозларнинг 99,76 фоизи кўриб чиқилган ҳолатда 87,29 фоиз овоз билан етакчилик қилмоқда. Бу ҳақда Марказий сайлов комиссиясига таяниб, “РИА Новости” хабар берди.
-jaUUszKP.jpg)
Сайловчиларнинг фаоллиги Россия тарихидаги рекорд кўрсаткични қайд этган. Сайлов участкаларига 87,1 миллиондан ортиқ россиялик, яъни сайловчиларнинг 77,44 фоизи келган. Россиядаги президентлик сайловларининг якуний натижалари 21 март куни сарҳисоб қилинади. Овозларнинг 99,76 фоизи ҳисоблаб чиқилгандаги натижалар қуйидагича:
- Россия Коммунистик партиясидан депутат Николай Харитонов — 4,30 фоиз;
- “Янги одамлар”дан дума вице-спикери Владислав Даванков — 3,84 фоиз;
- Россия Либерал демократик партиясидан Леонид Слуцкий — 3,21 фоиз.
Россия Ички ишлар вазирлиги сайловлар давомида 61 та жиноий иш қўзғатилиб, 150 дан ортиқ маъмурий баённомалар тузилганини маълум қилган. Ўтган сайловларда сайлов қутиларига зелёнка, ёд ва бошқа бўёқлар қуйиш, “Молотова коктейли” улоқтириш, петардаларни портлатиш ва дастурхонни ёқиб юбориш ҳолатлари кузатилган.
Путин бешинчи муддатга сайланиш мақсадлари қаторига “ҳарбий операция” вазифаларини ҳал этиш ва Россия мудофаа қобилияти ва армиясини мустаҳкамлашни киритган.
Владимир Путин икки йил олдин Украинага “махсус ҳарбий операция”, яъни уруш бошлашни буюрганди. 2023 йилда Халқаро жиноий суд Путинни украиналик болаларнинг депортацияси билан боғлиқ ҳолда ҳибсга олиш учун ордер берган. Ўзининг аввалги муддати давомида у Конституцияга ўзгартириш киритиб, ўзининг президентлик муддатини ноллаштирган.
Ўзбекистон президенти Путинни табриклади
Шавкат Мирзиёев 18 март куни Россиянинг амалдаги раҳбарини президент сайловида қозонган ишончли ғалабаси билан табриклади. Мамлакат етакчиси Путинга мустаҳкам соғлик, бахт-саодат ва давлатчилик фаолиятида катта муваффақиятлар, Россия халқига эса тинчлик ва равнақ тилади.
Изоҳ (0)