Россиянинг “Кама” автомобиль ишлаб чиқарувчи заводи Ўзбекистонни ўзининг янги электромобили — “Атом”ни ишлаб чиқариш учун потенциал майдон сифатида кўриб чиқмоқда. “ТАСС” ахборот агентлиги хабарига кўра, ушбу масала бўйича Ўзбекистон томони билан музокаралар аллақачон бошланган.
-xesGLfdt.jpg)
Давлат органлари ва корпоратив ҳамкорлар билан алоқалар бўйича директор Анатолий Кияшконинг маълум қилишича, Россия президенти Владимир Путин Ўзбекистон президенти Шавкат Мирзиёев билан учрашувда “Атом” автомобилини ишлаб чиқариш ва “Кама” компанияси ишлаб чиқаётган технологияларни Ўзбекистонда қўллаш имкониятини кўриб чиқиш мумкинлигини билдирган.
Компания Россия муҳандислари томонидан ишлаб чиқилган технологияларни Ўзбекистон билан бўлишишга тайёр. “Кама”, шунингдек, Хитой ва бошқа бир қатор давлатлар билан ишлаб чиқаришни маҳаллийлаштириш масаласини муҳокама қилмоқда.
“Атом” электромобили илк бор 2023 йил баҳорида оммага тақдим этилган. Унинг оммавий ишлаб чиқарилиши 2025 йилнинг иккинчи ярмига режалаштирилган. Электромобиль 77 кВт/соат сиғимли аккумулятор батареяси билан жиҳозланади ва у тўлиқ зарядда 500 километргача юради.
Техник хусусиятларга кўра, “Атом” 100 км/соат тезликка 8 сонияда эриша олади. Электромобильнинг бошланғич нархи 2,9 миллион рублни (жорий курс бўйича тахминан 32,1 минг АҚШ доллари) ташкил этиши кутилмоқда.
Изоҳ (0)