Ўзбекистонда 2024 йилда Давлат ижтимоий суғурта жамғармасидан хусусий секторда банд бўлган аёлларга тўлаб берилган ҳомиладорлик ва туғиш нафақаси бўйича маълумот берилди.
Нафақа олувчи бюджет ташкилотларидан ташқари барча юридик шахсда ва якка тартибдаги тадбиркорда меҳнат шартномасига асосан охирги 6 ой давомида узлуксиз иш стажига эга бўлган аёл ҳисобланади.
Иқтисодиёт ва молия вазирлиги хабарига кўра, ўтган йил давомида 15 минг 178 нафар фуқарога 38,1 миллиард сўм нафақа пуллари тўланган. Кўрсаткич 2023 йилда 33,1 миллиард сўмни ташкил этган. Нафақа миқдори 2 миллион 592 минг сўм, минимал истеъмол харажатларининг тўрт бараварини ташкил этган.
Нафақа олувчиларнинг энг кўпи Тошкент шаҳрида жойлашган — 3 481 нафар аёл. Уларга жами 8 миллиард 737 миллион сўм тўланган (республика бўйича улуши 22,9 фоиз). Ундан кейинги ўринларни 3 412 нафар аёл билан Тошкент вилояти (8 миллиард 576 миллион сўм) ва 1 374 кўрсаткич билан Фарғона вилояти эгаллаган (3 миллиард 546 миллион сўм).
Аввалроқ Иқтисодиёт ва молия вазирлиги 2025 йил учун давлат бюджети лойиҳасини эълон қилганди. Бу йил бюджетдан нафақалар, моддий ёрдам ва компенсация тўловлари учун жами 17,3 триллион сўм ажратиш режалаштирилган.
2025 йилда Ижтимоий ҳимоя миллий агентлигиг республика бюджетидан 21,1 триллион сўм маблағ йўналтириш прогноз қилинган. Агентлик маблағларни қуйидагича тақсимлайди:
- кам таъминланган оилаларга болалар нафақалари ва моддий ёрдамларга — 7,3 триллион сўм;
- меҳнатга лаёқатсиз ва зарур иш стажига эга бўлмаган фуқаролар нафақаларига — 5,6 триллион сўм;
- ногиронлиги бўлган болаларни парваришлаётган оналар нафақаларига — 2 триллион сўм;
- бола туғилиши учун бериладиган нафақалар (суюнчи пули)ни тўлаш учун — 275 миллиард сўм;
- дафн маросими харажатларини қоплаш учун — 271,3 миллиард сўм;
- етим болалар ва ота-она қарамоғидан маҳрум бўлган болаларни уй–жой билан таъминлаш учун —140 миллиард сўм;
- муҳтож шахсларни протез–ортопедия мосламалари ва реабилитация қилишнинг техник воситалари билан таъминлаш харажатларига — 70 миллиард сўм;
- Қорақалпоғистон Республикаси ва Хоразм вилоятидаги мухтож оилаларга бир марта бериладиган моддий ёрдам тўлаш харажатларига — 22,6 миллиард сўм.
Изоҳ (0)