Республикадаги барча пенсионерларга 2024 йил январь ойи учун пенсия маблағлари тўлиқ тўлаб берилди. Бу ҳақда Пенсия жамғармаси хабар берди.
Маълум қилинишича, 5 январь кунигача Пенсия жамғармаси томонидан тўлов рўйхатларига киритилган 3,9 миллион нафар пенсия олувчилар учун талаб этилган маблағлар тижорат банкларига тўланди.
“Ўз навбатида пенсия тўловларини нақд пулсиз шаклда олувчи 2,9 миллион нафар (ёки жами олувчиларнинг 74 фоизи) фуқароларнинг банк карталарига маблағлар тўлиқ юклаб берилиши таъминланди. Амалдаги қонунчилик талабларига мувофиқ, пенсия пулларини нақд шаклда олувчиларга жорий ой тўловлари тасдиқланган графикларга асосан Халқ банкининг сайёр кассалари томонидан етказиб берилишини маълум қиламиз”, — дейилади жамғарма хабарида.
Маълумот учун, 2023 йил 1 апрель ҳолатига пенсия олувчилар 3,8 миллион нафарни ташкил этганди. Жорий йил январига келиб, уларнинг сони 3,9 миллион нафарга етгани маълум бўлди.
Аввалроқ Пенсия жамғармаси давлат пенсияларининг барча турлари учун йиллик 53,5 триллион сўм тўланаётганини маълум қилганди. Бунда бир ойлик ўртача харажатлар миқдори қарийб 4,5 триллион сўмни ташкил этади.
Айни пайтда ёшга доир энг кам пенсия миқдори 725 минг сўм, ногиронлик пенсияси миқдори 800 минг сўмни ташкил этади.
Эслатиб ўтамиз, жорий йил январига қадар Пенсия жамғармаси тасарруфида нафақалар тўлови ҳам бор эди. 2023 йил 1 июндаги президент фармонига мувофиқ, 2024 йил 1 январдан бошлаб қуйидаги ижтимоий тўловлар Ижтимоий ҳимоя миллий агентлиги тасарруфига ўтказилди:
- ёшга оид нафақа;
- боқувчисини йўқотганлик нафақаси;
- ўзгалар парваришига муҳтож ногиронлиги бўлган 18 ёшгача болаларнинг парвариши билан банд бўлган қонуний вакилига нафақа;
- болаликдан ногиронлиги бўлган шахсларга нафақа (1 ва 2-гуруҳ, 18 ёшдан катта);
- 1 ва 2-гуруҳ ногиронлари учун нафақа;
- кам таъминланган оилалар учун болалар нафақаси;
- кам таъминланган оилаларга моддий ёрдам;
- фарзанд туғилганда бериладиган бир марталик нафақа (“суюнчи пули”);
- дафн қилиш учун нафақа (“дафн пули”).
Бунда ижтимоий тўловлар учун ариза бериш, уларни кўриб чиқиш, тайинлаш ва тўлашнинг амалдаги тартиби сақлаб қолинади. Эндиликда фуқаролар мазкур ижтимоий тўловлар билан боғлиқ барча саволларига туман ёки шаҳарлардаги “Инсон” ижтимоий хизматлар марказларига мурожаат қилишлари мумкин.
Фармон билан “Ижтимоий ҳимоя ягона реестри” ахборот тизими ҳам агентлик тасарруфига ўтказилиши белгиланган. Аҳолига кўрсатиладиган барча турдаги ижтимоий хизматлар ва ёрдамлар, шу жумладан, кам таъминланган оилалар болалари учун нафақа ва моддий ёрдамлар бўйича аризалар “Ягона миллий ижтимоий ҳимоя” ахборот тизими орқали қабул қилинади.
Изоҳ (0)