Жорий йил I чорагида давлат бюджетидан Пенсия жамғармасига 3,3 триллион сўм, кам таъминланган оилаларга нафақа ва моддий ёрдам учун 4,3 триллион сўм ажратилди. Бу ҳақда Иқтисодиёт ва молия вазирлиги маълумот берди.
2024 йил январь–март ойларида Ўзбекистонда кам таъминланган оилаларга болалар нафақаси, моддий ёрдам ва компенсация тўловлари учун давлат бюджетидан 4,3 триллион сўм ажратилди. Бунда ижтимоий нафақа олувчи оилалар ўртача сони 1 миллион 736 мингтани ташкил этди. Шундан 1 миллион 677 мингтаси болалар нафақаси, 58,9 мингтаси моддий ёрдам олган.
Нафақа тўловлари учун жами 2 триллион 463 миллиард сўм йўналтирилган. Шундан 2,4 триллион сўми кам таъминланган оилаларга болалар нафақаси, 67,5 миллиард сўми моддий ёрдам тўловлари учун ажратилган. Биринчи чоракда ижтимоий нафақа олувчи оилалар сони жами оилаларга нисбатан 17,8 фоизни ташкил этган.
Уч ой давомида энг кўп болалар нафақаси ва моддий ёрдам олган кам таъминланган оилалар Самарқанд вилояти аҳолиси ҳиссасига тўғри келган — 311,2 миллиард сўм (2023 йил 1 чоракда 382,1 миллиард сўм бўлган). Энг ками нафақа ва моддий ёрдам берилган оилалар Тошкент шаҳрида — 43,2 миллиард сўм (2023 йил I чоракда 52,7 миллиард сўм).
Жорий йилнинг дастлабки уч ойида ногиронлиги бўлган муҳтож шахсларга 25 937 дона реабилитация қилишнинг техник воситалари учун 10,1 миллиард сўм тўлаб берилди. Шу билан бирга, 27 нафар уй-жойга муҳтож деб топилган етим болалар ва ота-она қарамоғидан маҳрум бўлган болаларни уй-жой билан таъминлашга 4,2 миллиард сўм ажратилди.
Шу билан бирга:
- Меҳнатга лаёқатсиз ва зарур иш стажига эга бўлмаган фуқароларга ҳамда ногиронлиги бўлган болаларни парваришлаётган оналар нафақаларига—1,12 триллион сўм;
- Ногиронлиги бўлган болаларга нафақаларига—410,3 миллиард сўм;
- Бола туғилиши учун бериладиган нафақаларга (суюнчи пули) — 152,2 миллиард сўм;
- Дафн маросими харажатларини қоплаш учун— 59,6 миллиард сўм маблағлар ажратилган.
“2024 йилнинг январь–март ойларида хўжалик юритувчи субъектларда ишловчи 3 649 нафар аёлларга Давлат ижтимоий суғуртаси бўйича ҳомиладорлик ва туғиш нафақаси тўлаб берилиб, корхоналарнинг 8,6 миллиард сўмлик маблағлари ўз ихтиёрида қолдирилди”, —дейилади вазирлик ҳисоботида.
Биринчи чоракда давлат бюджетидан Пенсия жамғармасига 3,3 триллион сўм ўтказиб берилди.
Маълумот учун, 2023 йилда фуқароларнинг барча турдаги пенсиялари учун 53,6 триллион сўм йўналтирилган. Таққослаш учун, 2022 йилдаги жами кўрсаткич 44,9 триллион сўмни ташкил этган. Ҳозирда мамлакатда пенсия олувчилар сони 4 миллион нафарга яқинлашган.
Бюджет қонунчилигига кўра, 2024 йилда Пенсия жамғармасига 16 триллион сўм маблағ йўналтирилади (2023 йилдаги миқдор 15 триллион сўм). Прогноз қилинишича, 2025 йилда жамғармага 19 триллион сўм, 2026 йилда эса 23 триллион сўм маблағ ажратилади.
Иқтисодиёт ва молия вазирлиги 2023 йил учун “Фуқаролар учун бюджет” нашрини ҳам эълон қилди. Унга кўра, ўтган йилда ижтимоий ҳимоя учун амалга оширилган харажатлар мидқори 19,2 триллион сўмни ташкил этган. Шундан нафақалар учун 12,3 триллион сўм ажратилган.
Ўтган йили ҳам нафақа ва моддий ёрдам маблағлари олган оилалар сони бўйича Самарқанд вилояти етакчилик қилган. Вилоятда йил давомида 271,8 минг оила болалар нафақаси ва моддий ёрдам пуллари олган. Моддий ёрдам пулларини энг кам олган оилалар Тошкент шаҳрида қайд этилган. Ўтган йилда пойтахтда 32,2 минг оила болалар нафақаси ва моддий ёрдам пуллари олган.
Аввалроқ 2024 йил январдан Ўзбекистонда болалар нафақаси ва моддий ёрдам олувчи оилалар сони кескин қисқара бошлагани маълум бўлганди. Хусусан, январда 1,94 миллион, февралда 1,72 миллион, март ойида 1,53 миллионта оилага болалар нафақаси ва моддий ёрдам берилган. Апрелга келиб, 1,34 миллионта оила жами 645,5 миллиард сўм болалар нафақаси ва моддий ёрдам пуллари олган. Жорий йил бошидан бери 602,4 мингта оилага ёрдам бундай маблағлар ажратиш тўхтатилган.
Эслатиб ўтамиз, жорий йилда давлат бюджетининг иш ҳақи, стипендия ва ижтимоий нафақалар учун харажатлар миқдори ўтган йилдагидан 26,6 триллион сўм ( 2023 йилдаги кўрсаткич 150,5 триллион сўм) кўп бўлиши режалаштирилган.
Изоҳ (0)