Мексикада 4 минг долларлик сунъий интеллектли робот ит Монтеррей шаҳри кўчаларида сайр қилмоқда. Бу ҳақда Reuters хабар берди.
Ит эгаси сенатор Уолдо Фернандес ҳисобланади. Робот ҳар куни атрофдагиларга жонворларга ғамхўрлик қилиш қанчалик муҳимлигини эслатиб туради. У ташқи кўринишидан ҳақиқий уй ҳайвонига ўхшамаса-да, аллақачон шаҳар аҳолисининг эътиборини қозонишга улгурган. Бўйи деярли бигл зотидаги итдек келадиган кулранг робот “самимий овоз” билан:
“Салом, мен Уолдогман. Мен забонсизларга — кўчада яшовчи жониворларга овоз бериш учун шу ердаман”, дея мурожаат қилади.
Уолдог — робот эгаси уни ўз номи билан атаган — ҳозирча кўчаларда фақат ҳамроҳлари билан сайр қилиши мумкин. Унинг ҳаракатлари масофадан бошқарув пульти орқали назорат қилинади. Ҳайвонларга шафқатсиз муносабатда бўлиш муаммосини муҳокама қилиш ва селфиларга тушиш каби асосий вазифалардан ташқари, робот ит ижтимоий аҳамиятга эга ишларни ҳам бажаради.
Жумладан, кўча чиқиндиларини тозалайди ва дайди итларни рўйхатга олади. Уолдогнинг сайрларидан қандай натижа бўлгани ҳозирча номаълум, аммо унинг мавжудлиги ўткинчиларни хурсанд қилмоқда.
Изоҳ (0)