Республикада август ойи учун 4 миллион нафардан ортиқ пенсионерларга пенсия, 688,5 минг кишига ижтимоий нафақа маблағлари тўлаб берилди.
2024 йил август ойида пенсия тўловларини нақдсиз шаклда олувчиларга маблағлар тўлиқ молиялаштирилди. Бу ҳақда Пенсия жамғармаси хабар берди.
Қайд этилишича, тўлов рўйхатларига киритилган 4 миллион нафардан ортиқ пенсия олувчилар учун талаб этилган маблағлар тижорат банкларига ўтказилган. Пенсия тўловларини нақд пулсиз шаклда, яъни банк пластик карталари орқали олувчи 3,1 миллион нафар (ёки жами олувчиларнинг 78 фоизи) фуқароларга пуллар тўлиқ ўтказилган.
“Амалдаги қонунчилик талабларига мувофиқ пенсия пулларини нақд шаклда олувчиларга жорий ой тўловлари тасдиқланган графикларга асосан Халқ банкининг сайёр кассалари томонидан етказиб берилишини маълум қиламиз”, дейилади хабарда.
Бироқ август ойи учун жамғарма ва давлат бюджети ҳисобидан қанча миқдорда пенсия пуллари тўлаб берилгани тўғрисида маълумот тақдим этилмаган.
Жорий ойда Ижтимоий ҳимоя миллий агентлиги томонидан 688,5 минг нафар нафақа олувчилар маблағлари тижорат банкларига молиялаштирилиб берилган.
Агентлик хабарига кўра, ногиронлик нафақасини олувчилар сони бошқа турдаги нафақалардан кўп бўлган — 305,8 минг нафар.
Ўз навбатида 168,9 минг киши болаликдан ногиронлик, 80,2 минг киши ёшга доир, 73,4 минг одам парваришлаш нафақаларини олган. Боқувчисини йўқотганлик нафақасини олувчилар сони эса 53,1 минг нафарни ташкил этган.
“Нафақа тўловларини нақд пулсиз шаклда олувчи 489 минг нафар (ёки жами олувчиларнинг 69,5 фоизи) фуқароларнинг банк пластик карталарига маблағлар тўлиқ юклаб берилиши таъминланди”, дейилади агентлик хабарида.
Қўшимча қилинишича, нафақа пулларини нақд шаклда олувчиларга жорий ой тўловлари Халқ банкининг сайёр кассалари томонидан етказиб берилади.
Жорий йилнинг биринчи ярмида Ўзбекистонда ижтимоий нафақалар учун жами 7,7 триллион сўм тўлаб берилган. Шундан 55,5 фоизи болалар нафақаси ва моддий ёрдам, 40,2 фоизи ижтимоий нафақалар учун (ёшга доир, ногиронлик, 18 ёшгача ногиронлик, парваришлаш ва боқувчисини йўқотганлик) ажратилган.
Маълумот учун, 2024 йилда Пенсия жамғармасига давлат бюджетидан 16 триллион сўм маблағ йўналтирилади. Ижтимоий ҳимоя миллий агентлигига эса бюджетдан 20,1 триллион сўм ажратилиши белгиланган. Шундан 10,3 триллион сўми кам таъминланган оилаларга болалар нафақалари ва моддий ёрдамга, 3,7 триллион сўми ногиронлиги бўлган болаларга нафақаларни тўлаш учун ажратилиши кўзда тутилган.
Изоҳ (0)