Тошкент вилоятининг Янгийўл туманида фуқаролар ижтимоий картадан фойдаланишни бошлагани хабар қилинганди. Ижтимоий ҳимоя миллий агентлиги ушбу картага оид саволлар ва маълумотлар кўпайиб бораётганини инобатга олиб, энг муҳимларини аниқлаштириб ўтди.
Ижтимоий карта тажриба-синов босқичида Тошкент шаҳри ва Тошкент вилоятининг Янгийўл туманида жорий этилди.
Бунда, ижтимоий карта 2024 йилнинг декабрь ойидан бошлаб янги тайинланган 9 турдаги ижтимоий тўловлар олувчи шахсларга тақдим этилмоқда. Ушбу шахсларга ижтимоий карталар бепул берилади ва дастлаб тўлов воситаси (банк картаси) функциясини бажаради.
2024 йил 1 декабрдан бошлаб қуйидаги тўловлар ижтимоий карта орқали тўлаб берилмоқда:
- кам таъминланган оилаларга болалар нафақаси;
- кам таъминланган оилаларга моддий ёрдам;
- ёшга доир нафақа;
- ногиронлик нафақаси;
- ёлғиз кексалар ва ногиронлиги бўлган шахслар учун ҳар ойлик моддий ёрдам;
- ногиронлиги бўлган 18 ёшгача болаларга ногиронлик нафақалари;
- ногиронлиги бўлган болаларни парваришлаётган оналар учун нафақа;
- протез-ортопедия буюмлари ва реабилитация қилишнинг техник воситалари хариди учун ваучер;
- боқувчисини йўқотганлик нафақаси.
2025 йил 1 апрелдан бошлаб ушбу ҳудудлар (Тошкент шаҳри ва Тошкент вилоятининг Янгийўл туманида) бўйича яна қўшимча 2 турдаги ижтимоий тўловлар, яъни ҳомиладорлик ва туғиш нафақаси ҳамда “Саховат ва кўмак”, “Аёллар дафтари” ва “Ёшлар дафтари” жамғармалари ҳисобидан тўланадиган бир марталик моддий ёрдамлар ижтимоий карта орқали тўлаб берилади.
Ижтимоий карта қуйидаги тоифадаги шахсларга бепул берилади:
- Камбағал оилалар реестрига киритилган оилалар (шахслар);
- “Ижтимоий ҳимоя ягона реестри” ахборот тизими орқали кам таъминланган деб эътироф этилган оилалар;
- кўп болали оилаларнинг аъзолари;
- ногиронлиги бўлган шахслар;
- ўзгалар парваришига муҳтож шахслар бўлган ёлғиз яшовчи ва ёлғиз кексалар;
- ўзгалар парваришига муҳтож шахслар парвариши билан банд бўлган шахслар;
- етим болалар ва ота-она қарамоғидан маҳрум бўлган болалар;
- васийлар (ҳомийлар), тутинган ота-оналар;
- муомалага лаёқатсиз шахслар;
- муомала лаёқати чекланган шахслар;
- муомалага лаёқатсиз ва муомала лаёқати чекланган шахсларнинг қонуний вакиллари;
- пенсионерлар;
- давлат бюджети маблағлари ҳисобидан стипендия тўланаётган талабалар;
- давлат бюджети маблағлари ҳисобидан стипендия тўланаётган ўқувчилар (тингловчилар);
- шаҳар йўловчи транспортидан (таксидан ташқари) бепул фойдаланиш ҳуқуқига эга бўлган шахсларга.
Ижтимоий карта функциялари босқичма-босқич кенгайтириб борилади
2025 йилнинг 1 апрелидан бошлаб транспорт картаси ва имтиёзли транспорт картаси функцияларини ҳам бажаради. Яъни жамоат транспортида имтиёзли ёки бепул фойдаланиш ҳуқуқига эга бўлган шахслар, белгиланган имтиёзли ёки бепул тарифдан фойдаланган ҳолда, имтиёзга эга бўлмаган шахслар умумбелгиланган транспорт тарифларида транспортдан фойдаланишлари мумкин бўлади.
Ушбу функцияни жорий этиш мақсадида тегишли ахборот тизимларини интеграция қилиш бўйича ишлар амалга оширилмоқда.
Ижтимоий карта ариза берилган кундан бошлаб 3 иш куни ичида тақдим этилади. Ўзгалар парваришига муҳтож айрим шахсларга “Инсон” ижтимоий хизматлари марказлари томонидан 15 кун ичида ижтимоий карталар уларнинг яшаш жойига етказиб берилади.
Ижтимоий карта 2025 йил 1 июлдан бошлаб босқичма-босқич республиканинг барча ҳудудларига жорий этилади.
Ўзбекистонда ижтимоий карта тизими жорий этилиши ҳақида 2024 йил июлида Шавкат Мирзиёевга тақдим қилинган ижтимоий ҳимоя соҳасидаги қўшимча чора-тадбирлар тақдимотида маълум қилинганди. Бу тартиб дастлаб Тошкент шаҳри ва Янгийўл туманида, кейинги йилдан бошқа ҳудудларда жорий этилиши белгиланганди.
Президент 2024 йил декабрида ўтказилган видеоселектор йиғилишида ҳозирги кунда 65 турдаги ижтимоий хизмат ва ёрдам олиш учун фуқароларимиз туғилганлик, ногиронлик тўғрисида, пенсия, талабалик гувоҳномаси, банк картаси каби 10 дан ортиқ ҳужжатни кўтариб юришга мажбурлигини, бундай оворагарчиликка чек қўйиш вақти келганини таъкидлаганди.
Ижтимоий карта бир вақтнинг ўзида ҳам тўлов воситаси, ҳам эҳтиёжманд тоифага мансублик тасдиғи ҳисобланади. Бу орқали қоғоз шаклидаги ҳужжатлар бекор қилиниб, вақт ва маблағ тежалади. 72 турдаги ижтимоий хизматлар, 76 турдаги ёрдамлар ва 200 га яқин имтиёзлар ягона электрон тизимга умумлаштирилади.
Изоҳ (0)