Самарқанд вилоятида 19 нафар ҳоким ёрдамчиси жиноий жавобгарликка тортилди. Бу ҳқда ЎзА хабар берди.
Келтирилишича, Самарқанд вилояти коррупцияга қарши курашиш ҳудудий кенгашининг навбатдаги йиғилиши ўтказилди. Кенгаш аъзолари, вилоятдаги бошқарма ва идоралар, нодавлат нотижорат ташкилотлари вакиллари иштирок этган йиғилишда вилоят камбағалликни қисқартириш ва бандлик бошқармаси ҳамда унинг тасарруфидаги ташкилотларда коррупцияга қарши курашиш борасидаги ишлар ва бу борадаги қонунчилик ижросини ўрганиш якунлари таҳлил этилди.
Тегишли дастурлар доирасида бандлик органлари ва ҳоким ёрдамчилари тавсиясига асосан вилоятдаги банк муассасалари томонидан 2023-2024 йиллар ва жорий йилнинг 4 ойида 98 минг фуқарога 1 триллион 803 миллиард сўм кредитлар ажратилган, 12,1 минг нафар юртдошга 63 миллиард сўмлик субсидиялар берилган ва 207 минг нафари касб-ҳунар ва тадбиркорликка ўқитилган.
Қайд этилишича, соҳада манфаатлар тўқнашувига оид ҳамда коррупцияга мойил бўлган муносабатлар сақланиб қолмоқда. Хусусан, жорий йилнинг биринчи чорагида 3300 дан ортиқ ҳолатда ҳисоботларга қўшиб ёзилиши аниқланган ва бунинг натижасида 80 дан ортиқ ҳоким ёрдамчиси ва бошқа масъулларга нисбатан интизомий, маъмурий ва жиноят ишлари қўзғатилди (19 нафар ҳоким ёрдамчиси жиноий жавобгарликка тортилди). 3 миллиард сўмлик субсидия, нафақа ва кредит маблағлари талон-торож қилинган.
Ҳоким ёрдамчилари томонидан содир этилган жиноятларнинг салмоқли қисми Самарқанд шаҳри, Ургут, Иштихон ва Оқдарё туманлари ҳисобига тўғри келсада, маҳаллий ҳокимлик идоралари ёки бандлик органлари томонидан хизмат текширувлари ўтказилмаган.
Бандлик органларининг “Ягона миллий меҳнат тизими” электрон платформаси орқали амалда иш билан банд бўлган ёки ўзини-ўзи банд қилган 155 нафар фуқаро учун базавий ҳисоблаш миқдорининг 30 баробаригача миқдорда субсидиялар берилган. Бундай ҳолатларга асосан Каттақўрғон шаҳри, Каттақўрғон, Нуробод, Нарпай, Жомбой, Оқдарё, Булунғур Самарқанд ва Пайариқ туманларида йўл қўйилган.
2023-2024 йилларда бюджет маблағлари ҳисобидан таъминотчи корхоналардан сотиб олинган 63 миллиард сўмлик асбоб-ускуналар жойларга олиб борилиб, ҳоким ёрдамчилари иштирокида ишсиз фуқароларга топширилган ва тегишли ҳужжатлар расмийлаштирилган. Аммо ижтимоий реестрдаги фуқароларга ёрдам тариқасида субсидиялар бериш йўналишида ҳам суиистеъмолликка йўл қўйилаётгани кузатилмоқда.
“Манфаатлар тўқнашуви тўғрисида”ги қонунда давлат муассасалари ходимларига манфаатлар тўқнашуви билан боғлиқ, айниқса, эҳтимолий манфаатлар тўқнашуви юзага келиши мумкин бўлган ҳолатларда чекловлар ўрнатилган. Аммо бандлик органларининг 12 нафар ходими ва 25 нафар ҳоким ёрдамчиси тадбиркорлик субъекти ташкил қилиб, бошқариб келган.
Йиғилишда мазкур ҳолатлар юзасидан вилоят камбағалликни қисқартириш ва бандлик бошқармаси ҳамда бошқа ташкилотлар раҳбарларидан изоҳ сўралди.
Коррупцияга қарши чоралар
Ўзбекистонда коррупция хавф-хатарларини аниқлаш ва бартараф этиш бўйича янги механизм жорий этилади.
Коррупциявий омилларни аниқлаш ва бартараф этиш бўйича “Андижон тажрибаси” асосида барча ҳудудлар томонидан “йўл хариталари” ишлаб чиқилиб, ижрога қаратилгани, коррупциянинг олдини олиш, айниқса, маиший коррупцияга барҳам бериш, ҳудудларда коррупцияга нисбатан муросасиз муҳит яратиш мақсадида янги механизмларни йўлга қўйиш юзасидан тузилган Республика ва ҳудудий ишчи гуруҳларининг вазифалари бирма-бир таъкидлаб ўтилган.
Ўзбекистонда коррупция жиноятлигига қарамай республика дунёнинг энг коррупциялашган давлатларидан бирилигича қолмоқда. Бу ҳақда Transparency International ташкилоти эълон қилиб келаётган индексларда қайд этилган. Масалан, ташкилотнинг 2024 йилда 180 та давлатни қамраган коррупция рейтингида Ўзбекистон 121-ўринни эгаллаган. Умумий 100 баллик баҳолашдан бор–йўғи 32 балл тўплаган. Жами 50 баллдан паст натижа давлатда коррупция юқори даражада эканини англатади. Шу боис, муаммога қарши курашиш бугун янада долзарб аҳамиятга эга. Президент Шавкат Мирзиёев раислигида ўтказилган йиғилишда бу масала кенг таҳлил қилинди.
Қайд этилишича, ҳозир Ўзбекистонда коррупциявий жиноятларнинг 75 фоизи туман ва маҳаллада маиший коррупция шаклида содир этилмоқда. Жумладан, инфратузилмага уланиш, лицензия олиш, имтиёзли кредит ажратиш, ишга қабул қилиш, малака ошириш каби йўналишларда коррупция омиллари кўп.
Изоҳ (0)