Ўзбекистонда июндаги пенсия ва нафақа тўловлари бўйича маълумот берилди

Республикада июнь ойи учун 4 миллион кишига пенсия, 1,2 миллионта оилага нафақа маблағлари тўлаб берилди.

2024 йил июнь ойи учун 1 миллион 207 мингта кам таъминланган оилаларга 596 миллиард 853 миллион сўм миқдоридаги маблағлар “Халқ банки”га тўлаб берилди. Бу ҳақда Ижтимоий ҳимоя миллий агентлиги хабар қилди.

Кам таъминланган оила сифатида нафақа олувчи 1 миллион 118 мингта оилаларга (92,6 фоиз) банк карталари орқали тўловлар амалга оширилади. Амалдаги қонунчилик талабларига мувофиқ, нафақа пулларини нақд шаклда олувчи оилаларга жорий ой тўловлари “Халқ банки”нинг сайёр кассалари томонидан ойнинг 27-санасигача етказиб берилади,—дейилади агентлик хабарида.

Таққослаш учун, апрель ойида республикада 1,34 миллионта кам таъминланган оилаларга 645,5 миллиард сўм маблағ тўланганди. 2023 йилда эса 2,2 миллион оилага жами 12,3 триллион сўм болалар нафақаси ва моддий ёрдам пуллари тўлаб берилган.

Қайд этилишича, июнь ойида 143,8 мингта кам таъминланган оилалар “Ижтимоий ҳимоя ягона реестри” ахборот тизимига киритилган. Шундан 135 минг 822 тасига болалар нафақаси, 7 минг 976 тасига моддий ёрдам тайинланган.

Июнь ойида пенсия пулларини нақдсиз шаклда олувчиларга ҳам маблағлар тўлиқ молиялаштирилди.

“Июнь ойи тўлов рўйхатларига киритилган 4 миллион нафар пенсия олувчилар учун талаб этилган маблағлар тижорат банкларига молиялаштирилиб берилди”, —дея хабар берди Пенсия жамғармаси.

Қўшимча қилинишича, пенсия тўловларини нақд пулсиз шаклда олувчи 3,1 миллион нафар (77 фоиз) фуқаролар банк карталарига маблағлар тўлиқ ўтказилган.

2024 йил 1 июнь ҳолатига Ўзбекистон ҳудудида жами оилалар сони 9 миллион 729 минг 960 тани ташкил этди. Шундан 12 фоизи ижтимоий нафақа ва моддий ёрдам олувчи оилалар ҳиссасига тўғри келган.

Аввалроқ 2024 йил январь–март ойларида Ўзбекистонда кам таъминланган оилаларга болалар нафақаси, моддий ёрдам ва компенсация тўловлари учун давлат бюджетидан 4,3 триллион сўм ажратилгани хабар қилинганди. Бунда ижтимоий нафақа олувчи оилалар ўртача сони 1 миллион 736 мингта бўлган. Шундан 1 миллион 677 мингтаси болалар нафақаси, 58,9 мингтаси моддий ёрдам олган.

Биринчи чоракда давлат бюджетидан Пенсия жамғармасига 3,3 триллион сўм трансфертлар амалга оширилган. 2023 йилда фуқароларнинг барча турдаги пенсиялари учун жами 53 триллион 596 миллиард сўм йўналтирилган. Таққослаш учун, 2022 йилдаги жами кўрсаткич 44,9 триллион сўмни ташкил этган.