Нью-Йорк, худди бир йил аввалгидек, энг кўп миллионерлар яшайдиган дунё шаҳарлари рейтингида биринчи ўринни эгаллади. Бу ҳақда “Дарё”га Henley & Partners ва New World Wеаlth томонидан эълон қилинган ҳисоботдан маълум бўлди.
Ҳисоботга кўра, Хитой ва Америка шаҳарлари рейтингнинг энг юқори поғонасидан жой олган, биринчи ўнталикка кирувчи ягона Европа шаҳри — Лондон.
Хусусан, айни пайтда етакчи Нью-Йорк шаҳрида (АҚШ) 340 минг миллионер истиқомат қилади.
10 йил аввал рўйхатда биринчи ўринни эгаллаган Токио (Япония) 290,3 минг миллионер билан иккинчи, 285 минг миллионер билан Сан-Франсиско (АҚШ) учинчи ўринда.
Тўртинчи ўринни 258 минг бадавлат аҳолиси билан Лондон (Буюк Британия), бешинчи ўринни эса 240,1 минг миллионер билан Сингапур эгаллади.
Ўтган йилга нисбатан кучли бешлик етакчилари ўзгармаган бўлса-да, иккинчи бешликда маълум ротациялар содир бўлди.
Шундай қилиб, Лос-Анжелес (АҚШ) олтинчи ўринни сақлаб қолди (205,4 минг миллионер), лекин Чикаго ва Хьюстон (иккаласи ҳам АҚШда) кучли ўнликдан тушиб кетди.
Аммо Гонконг еттинчи ўринни эгаллаб, кучли ўнликка қайтди (129,5 минг миллионер). Саккизинчи ва тўққизинчи ўринларда ўтган йилгидек Хитойнинг Пекин (128,2 минг бой) ва Шанхай (127,2 минг миллионер) шаҳарлари жойлашган.
Кучли ўнликни Сидней (Австралия) якунлаб турибди, у кучли ўнликка янги кирган (126,9 минг миллионер).
Сидней 2040 йилга бориб дунёнинг энг бой беш шаҳарларидан бири бўлиши прогноз қилинмоқда.
Изоҳ (0)