34 ёшли канадалик хонанда ва актёр The Weeknd (Эйбел Тесфайе) Лос Анжелес ўт ўчирувчилари ҳамда ўрмон ёнғинларидан жабр кўрган инсонлар учун 1 миллион доллар хайрия қилишини айтди.
У хайрия маблағини бир нечта ташкилотларга, жумладан, LAFD Foundation, GoFundМе’нинг ёнғиндаги ёрдам фонди ва LА Regional Bank’ка юборишини маълум қилди. Унинг гуманитар ёрдам иши АҚШ Жаҳон озиқ-овқат дастури ва ХО жамғармаси (хонандага тегишли) билан ҳамкорликда амалга оширилади.
Шунингдек, The Weeknd Лос Анжелесдаги Rose Bowl стадионида 25 январга белгиланган концерт дастурини бекор қилди. 31 январга қолдирилган “Hurry Up Tomorrow” альбомининг премьерасини ҳам яна ортга сурди. Мазкур альбом The Weeknd карьерасидаги олтинчи лонг плей ҳисобланади.
Маълумот учун, The Weeknd сўнгги беш йил ичида хайрия ишларига тахминан 10 миллион доллар ажратган.
Калифорнияда ўрмон ёнғинлари 7 январдан бери Тинч океанининг Палисейдс ҳудудидан бошланиб, Малибу ва Санта Моника курорт шаҳарчасига тарқалмоқда. Кўплаб машҳурларнинг уйлари ёниб кетди. Аллақачон уйларини йўқотган машҳурлар орасида Перис Ҳилтон, Анна Фарис, Адам Броди, Лейтон Мистер, Спенсер Пратт ва Ҳейди Монтаг, Жеймс Вудс, Жейми Ли Кертис, Евгений Леви, Майлс ва Келли Теллер, Жон Гудман ва бошқалар бор. Жумладан, Энтони Ҳопкинснинг 6 миллион долларлик уйи ҳам ёниб кетди.
Изоҳ (0)