Economist Intelligence Унит таҳлилий компанияси экспертлари Жаҳон яшаш нархи рейтингини янгилади ва яшаш учун энг қиммат шаҳарлар рўйхатини тузди. Бутун дунё бўйлаб ўртача яшаш қиймати йил давомида 7,4 фоизга ошган.
CNN хабар беришича, таҳлилчилар уй-жой ижараси, озиқ-овқат сотиб олиш, даволаниш учун тўлов ва бошқа зарур харажатлар энг юқори бўлган дунёдаги энг “қиммат” шаҳарларни аниқлаган. Рейтингга 173 та йирик шаҳар киритилди. Рейтинг муаллифлари 400 номдаги турли товар ва хизматлар нархларини солиштирган.
Швейцариянинг Цюрих шаҳри ва Сингапур шаҳар-давлат биринчи ва иккинчи ўринларни эгаллашди. Учинчи ва тўртинчи ўринлар Нью-Йорк ва Женевага насиб этди. Рўйхатда кейинги ўринлардан Гонконг, Лос-Анжелес, Париж, Тель-Авив, Копенгаген ва Сан-Франсиско жой олган.
CNN таъкидлаганидек, Россиянинг Москва ва Санкт-Петербург мегаполислари жорий йилда рейтингда кескин пастлаб кетди. Ҳозир улар мос равишда 142 ва 147 ўринларни эгаллаб турибди. Шунингдек, Пекинда йил давомида яшаш нархи пасайган.
Дунёдаги энг арзон (лекин яшаш учун энг қулай бўлмаган) мегаполис Суриянинг Дамашқ шаҳри бўлиб қолмоқда. Шунингдек, рўйхатнинг энг қуйи поғонасида Теҳрон ва Триполи жойлашган. Шуниси эътиборга лойиқки, Венесуэла пойтахти Каракас ушбу рўйхатдан чиқариб ташланган, шаҳарда аномал инфляция мавжуд бўлиб, у ерда нархлар 2023 йил бошидан буён 450 фоизга ошди.
Таҳлилчиларнинг фикрича, коммунал хизматлар нархи АҚШ шаҳарларида энг юқори. Европа шаҳарларида эса кўнгилочар, жамоат транспорти ва уй-рўзғор буюмлари нархи энг юқори. Осиё шаҳарларида бўлса озиқ-овқат ва спиртли ичимликлар энг юқори нархга эга.
Умуман олганда, дунё бўйлаб яшаш нархи ошиб бормоқда. Бу жараёнга энергия ресурслари нархининг ошишига олиб келган қуролли тўқнашувлар ва салбий иқлим ўзгаришлари таъсир кўрсатган, бунинг натижасида озиқ-овқат нархлари кўтарилган. Шу билан бирга, экспертлар 2024 йилда глобал инфляциянинг секинлашиши кутилаётганини қайд этишмоқда.
Изоҳ (0)