Бухородан Тошкентга касал мол гўшти маҳсулотларини олиб келаётган Isuzu юк машинаси аниқланди. Бу ҳақда «Янги давр» информацион дастурида хабар қилинди.
Қайд этилишича, 16 апрель куни Isuzu автомобили ЙПХ ходими томонидан назорат ўтиш масканида текшириш учун тўхтатилган. Аммо ҳайдовчи қонуний талабга бўйсунмасдан, ҳаракатни давом эттирган. Юк машинаси шу жойда хизмат олиб бораётган ходимлар томонидан тўхтатилиб, машина юкхонаси текширилган. Натижада камида 500 кг миқдорда йирик шохли мол гўшти борлиги аниқланган. Ҳайдовчи эса гўшт маҳсулотига оид зарур ҳужжатларни тақдим эта олмаган.
Шундан сўнг олиб борилган махсус текширувлар натижасида гўшт маҳсулоти истеъмолга яроқсиз экани ва тўрт бош касал моллар сўйилиб, Тошкентга олиб келинаётгани маълум бўлган. Ушбу маҳсулотлар ветеринария-лаборатория экспертиза хулосасига асосан, истеъмол учун яроқсиз деб топилиб, тегишли тартибда утилизация қилинган.
Ҳозирда гўшт маҳсулотларини Тошкентга олиб кирмоқчи бўлган шахсларга қонуний чора кўриш учун терговга қадар текширув ҳаракатлари олиб борилмоқда.
Изоҳ (0)