Twitter ижтимоий тармоғи асосчиларидан бири ва собиқ раҳбари Жек Дорси янги Sun Day номли иловани ишлаб чиқди. Дастур геолокацияга қараб қуёшда қанча вақт хавфсиз юриш мумкинлигини баҳолайди ва танангиз олиши мумкин бўлган D витамини миқдорини ҳисоблаб беради.
Илова фойдаланувчининг жойлашувини аниқлаб, ўша ҳудуддаги ултрабинафша (УВ) нурланиш индекси ҳамда қуёш чиқиши давомийлигини кўрсатади.
Фойдаланиш тартиби жуда оддий. Дастлаб иловада терингиз турини ва устингиздаги кийим қанчалик очиқлигини белгилайсиз. Сўнг кўчага чиққанда “Бошлаш” тугмасини босасиз. Шунда илова сессияни ишга туширади ва сизга тахминий D витамини миқдорини халқаро бирликларда ҳисоблаб беради.
Шунингдек, Sun Day иловаси Burn Limit деб номланган кўрсаткичга ҳам эга. Бу фойдаланувчининг очиқ ҳавода яна қанча вақт юриши мумкинлигини билдиради ҳамда тери куйишининг олдини олиш учун чекловлар беради.
Бу Дорси томонидан сўнгги пайтда ишлаб чиқилган иккинчи дастурий маҳсулотдир. Бир неча кун аввал у Bitchat номли интернетга уланмасдан ишлайдиган, шифрланган мессенжерни ҳам оммага тақдим этган эди. Ҳар икки лойиҳа Goose номли сунъий интеллект ёрдамида ишлаб чиқилган.
Sun Day ҳозирча фақат iOS тизимида мавжуд. Уни ўрнатиш учун аввал TestFlight дастурини юклаб олиш керак. Шундан сўнг Sun Day иловасини ўрнатиш мумкин. Android версияси ҳозирча ишлаб чиқилмаган.
Изоҳ (0)