Андижон шаҳрида олти ойдан буён итларни сўйиб, уларнинг гўштини истеъмол қилиш билан шуғулланиб келган шахс ушланди, деб хабар берди вилоят ИИБ матбуот хизмати.
Маълум қилинишича, 26 июнь Андижон шаҳар СЕО ва ЖSXга шаҳардаги «Ўзгариш» МФЙда яшовчи фуқаролар томонидан маҳаллада ит сўйиш билан шуғулланаётган шахс борлиги ҳақида мурожаат келиб тушган.
Мурожаатга кўра, маҳалланинг Т.Келдиев кўчаси 75-уйда яшовчи О.Ғ.нинг яшаш хонадони бориб ўрганилган. Ўрганиш давомида фуқаро ўз хонадонида жами 12 та итни боқиш қоидаларини бузган ҳолда сақлаб келаётгани аниқланган ҳамда у ердан итнинг териси ва суяклари топилган.
Қайд этилишича, О.Ғ охирги олти ойдан буён ўзининг истеъмоли учун итларни сўйиб, гўштини истеъмол қилиб келган, аммо ит гўштини гўшт маҳсулоти сифатида бирон бир шахсга сотмаган ва топширмаган.
Иш бўйича тўпланган ҳужжатлардан келиб чиқиб, О.Ғ. Маъмурий жавобгарлик тўғрисидаги кодекснинг 110-моддаси (ит ва мушук боқиш қоидаларини бузиш) ва 111-моддаси (ҳайвонларга нисбатан шафқатсиз муносабатда бўлиш) 1-қисмларида назарда тутилган ҳуқуқбузарликларни содир этган деб топилиб, унга нисбатан маъмурий баённома расмийлаштирилган.
Ҳозирда О.Ғ.дан ҳуқуқбузарлиги юзасидан белгиланган жаримани ундириш чоралари кўрилмоқда.
Эслатиб ўтамиз, апрель бошларида Қашқадарёда уйида эшак сўйиб сотаётган шахслар аниқланган эди.
Изоҳ (0)