Ўзбекистонда йил бошидан бери ўн мингдан ортиқ ходимнинг 130 млрд сўмга яқин маоши ундириб берилди. Бу ҳақда Камбағалликни қисқартириш ва бандлик вазирлиги хабар берди.
Қайд этилишича, Камбағалликни қисқартириш ва бандлик вазирлиги Давлат меҳнат инспекцияси меҳнат ва меҳнатни муҳофаза қилиш қонунчилигига риоя этилиши устидан давлат назоратини ҳамда текширувини амалга оширади.
Жорий йилнинг биринчи ярмида инспекция томонидан ўтказилган назорат тадбирлари давомида 10 501 нафар ходимнинг 129 млрд 769 млн сўм ойлик иш ҳақи ва унга тенглаштирилган тўловлари ундириб берилди.
- Шундан:
109 млрд 106 млн сўм Давлат меҳнат инспекторлари аралашуви билан ундирилган. - 20 млрд 663 млн сўм суд орқали ундирилган.
Келтирилишича, булар орасида йирик иш берувчилар ҳам, кичик ва ўрта бизнес субъектлари ҳам мавжуд.
Меҳнат ҳуқуқи бўйича мутахассис Саидали Мухторалиев энди давлат фуқаролик хизматчисини ноқонуний бўшатиш раҳбарга жуда қимматга тушишини маълум қилганди. Ҳуқуқшуноснинг тушунтиришича, “Давлат фуқаролик хизмати тўғрисида”ги қонуннинг 51-моддасида (давлат фуқаролик хизматчиси фаолиятининг қонунга хилоф равишда тугатилиши оқибатлари) шундай дейилган:
➖ Давлат фуқаролик хизмати лавозимига тикланган давлат фуқаролик хизматчисига унинг фаолияти қонунга хилоф равишда тугатилгани туфайли етказилган зарарнинг ўрни Ўзбекистон Республикаси Давлат бюджети маблағлари ҳисобидан қопланади.
➖ Давлат фуқаролик хизматчиси фаолиятининг қонунга хилоф равишда тугатилишида айбдор бўлган шахс қонунда белгиланган тартибда жавобгар бўлади. Давлат фуқаролик хизматчиси фаолиятининг қонунга хилоф равишда тугатилиши билан боғлиқ зарарнинг миқдори айбдор шахсдан регресс тартибида ундирилади.
Бу нормалар фаол ҳолатга кирган экан, энди ноқонуний бўшатишлар натижасида давлат органларидан ундирилган суммалар бирма-бир сарҳисоб қилинади. Бюджетдан ундирилган ҳар бир сўм ва ҳар бир тийин айбдор шахсларнинг чўнтагидан регресс тартибда қайта ундириб олинади, деди ҳуқуқшунос.
Изоҳ (0)