Дунёдаги энг йирик онлайн савдо платформаси — Американинг Amazon компанияси Марказий Осиёдан, шу жумладан, Ўзбекистондан бўлган сотувчиларга ўз товарларини сайтда рўйхатдан ўтказишга рухсат бергани ҳақида хабар берилган эди. Ўзбекистон мусулмонлари идораси Фатво ҳайъати Amazon интернет бозорида сотилаётган товарни ҳам, харидорни ҳам кўрмасдан савдо қилиш ҳалолми, деган саволга жавоб берди.
«Бисмиллаҳир Роҳманир Роҳим. Киши сотиб олган молини ҳали қўлига олмай туриб, бошқага сотмаслиги лозим. Чунки молни қўлга олишдан аввал сотиш ва ундан фойдаланиш шаръан ҳаромдир.
Ҳаким ибн Ҳизом розияллоҳу анҳу Расулуллоҳ саллоллоҳу алайҳи васалламдан ривоят қилинган, яъни ‘Ўзингда бўлмаган нарсани сотма’ деган ҳадисга биноан шариатда ман қилингандир. Шунингдек, Имом Аҳмад ва Имом Абу Довудлар Зайд ибн Собит разияллоҳу анҳудан ривоят қилган ҳадисда: Расулуллоҳ (с.а.в.) ‘Савдо моллари сотилган жойида токи тожирлар (изоҳ: савдогарлар) ўз молига қўшиб олмагунча қайтадан сотилмас’, деганлар.
Агар сотиб олинган товарни сотиб олувчи ёки унинг вакили қўлига олса, сўнг бу товарни сотиш жоиз бўлади. Агар сотиб олувчи ёки унинг вакили товарни қўлига олмайдиган бўлса, сотиш жоиз эмас. Сотишдан олдин сотиб олинган нарсани қўлга олиш шарт. Валлоҳу аълам», — дейилади Фатво ҳайъати хабарида.
Изоҳ (0)