Чироқчи ҳокими фуқарога қўл кўтарди. У аввалроқ сўкиниши билан жамоатчиликка яхши танилганди

Қашқадарё вилоятининг Чироқчи тумани ҳокими Файзулла Юсупов фуқарога қўл кўтарди. Воқеа ҳудуддаги кузатув камераларига тушиб қолган. 

Видеога изоҳ берувчига кўра, туман ҳокими аввалига тандирни тепган ва сўнгра ИИБ ходимлари ёнида турган фуқарога тарсаки туширган. Ҳолат бўйича бошқа маълумот йўқ. 

“Дарё” воқеани аниқлаштириш мақсадида Чироқчи тумани ҳокимлиги ахборот хизмати билан боғланди. 

Ҳолат ҳақида бизда ҳам аниқ маълумот йўқ. Айни пайтда йиғилиш бўляпти. Ҳоким билан мулоқот қилиб, воқеага аниқлик киритиб берамиз, деди “Дарё” журналисти билан суҳбатда бўлган масъул Собит Абдунаимов. 

Файзулла Юсупов вилоят Молия бош бошқармаси бошлиғи лавозимини бажараётган пайтда ходимини “мол”, “эшак” дея ҳақоратлаб, жамоатчилик эътиборига тушганди. Мазкур аудиоёзувда собиқ бошқарма бошлиғи, айни кунда ҳокимлик қилаётган Юсуповнинг “Ўзингни ўзинг оссанг бўлмайдими?”, “Замон тўғри келганда, пешонангдан отардим”, “Аёллар, кўкрагингни очиб юрма бу ерда. Ҳеч ким сенинг кўкрагингни кўраман деб келаётгани йўқ, бошқа жойда очиб кўрсат”, “Ҳокимингга чиқаман, қани, бир минутда жазолаб бермасин-чи, сендақа молия мудирчаларини”, деган гаплари янграганди. Шундан сўнг у огоҳлантириш олганди. 

“Дарё” ушбу мавзуга қайтади.