Xorazm viloyatida 5-iyundan ichimlik va oqova suv xizmatlari narxlari oshishi ma’lum qilindi.
Xabar berilishicha, 5-iyundan Xalq deputatlari Xorazm viloyat kengashining qaroriga binoan yangi tariflar tasdiqlandi.Unga ko‘ra 2025-yilning 5-iyunidan quyidagi belgilangan tariflar amalda qo‘llaniladi:
Ichimlik suvi:
- aholi uchun — 1 m3 – 4 500 so‘m;
- byudjet tashkilotlari uchun — 1m3 – 10 400 so‘m;
- ulgurji iste’molchilar uchun — 1m3 – 10 400 so‘m;
Oqova suv xizmati:
- aholi uchun — 1 m3 – 1 850 so‘m;
- byudjet tashkilotlari uchun — 1m3 – 3 800 so‘m;
- ulgurji iste’molchilar uchun — 1m3 – 3 800 so‘m.
Narxlar qo‘shimcha qiymat solig‘isiz ko‘rsatilgan.
Qayd etilishicha, ichimlik va oqova suv xizmatlari uchun oldindan to‘lov amalga oshirilgan taqdirda ikki oy davomida eski tariflar bo‘yicha hisob-kitob yuritiladi.
Xorazm viloyat aholisining ichimlik suvi bilan ta’minlanganlik darajasi 2017-yil 52,2 foizni tashkil etgan bo‘lsa 2025-yilning 1-yanvar holatiga ushbu ko‘rsatkich 91,6 foizga yetkazildi. Joriy yil yakuni bilan esa 92 foizga yetkazilishi kutilmoqda.
O‘zbekistonda 2025-yilning 1-yanvar holatiga 5,8 mln kvartira (uy)lar ichimlik suvi bilan taʼminlangan. Kvartira (uy)larning ichimlik suvi bilan taʼminlanganlik darajasi 77,1 foizni tashkil etdi (2024-yil 1-yanvar holatiga — 75 foiz).
“O‘zsuvtaʼminot” bergan ma’lumotga ko‘ra, O‘zbekistonda 2025-yilda 715 ming aholiga ilk bor toza ichimlik suvi yetib boradi. Joriy yilda 1 619 kilometr ichimlik suvi, 521 kilometr oqova suv tarmoqlarini tortish, tizimdagi 162 ta inshootni qurish va rekonstruksiya qilish rejalashtirilgan.
2025-yil yanvar oyi holatiga ko‘ra, O‘zbekiston aholisining 80,9 foizi markazlashgan ichimlik suvi bilan ta’minlangan. So‘nggi 6 yilda aholining ichimlik suvi taʼminotini yaxshilashga 10 trillion so‘mga yaqin mablag‘ yo‘naltirildi. Ushbu mablag‘lar hisobidan 1 176 ta suv inshooti va 20,8 ming kilometr ichimlik suvi tarmoqlari tortildi.
O‘zbekistonda 2026-yilda markazlashgan ichimlik suvi bilan taʼminlanganlik 90 foizga, oqova suv xizmati bilan qamrab olinganlik darajasi 35 foizga yetkaziladi.
Izoh (0)