Республика бўйича 26,9 минг нафар жисмоний ва юридик истеъмолчи қарздорлиги учун сув таъминоти тармоғидан узилган. Бу ҳақда 2024 йил 11 октябрь куни “Ўзсувтаъминот” АЖ ахборот хизмати раҳбари Акмал Муродов маълум қилди.
Ушбу ҳолатларнинг 13,3 мингтаси, яъни энг юқори кўрсаткичи Тошкент шаҳрида қайд этилган.
Маълум қилинишича, 2024 йилда сув таъминоти ва оқова сув тизимларига 8 500 та ноқонуний уланиш ҳолатлари аниқланди. Бунда энг юқори кўрсаткичлар қуйидагича:
- Фарғона вилоятида – 1 500 та;
- Тошкент шаҳрида –1 400 та;
- Сирдарё вилоятида –1 400 та.
Мазкур қонунбузарликлар туфайли жамият манфаатларига жами 75,7 миллиард сўмдан ортиқ зарар етказилган.
Сув таъминоти тармоқларига ноқонуний уланиш ҳамда сув таъминоти ва канализация хизматлари бўйича 139,3 минг нафар истеъмолчидан жами 421 миллиард сўмлик маблағни ундириш мақсадида фуқаролик ва иқтисодий судларга тегишли ҳужжатлар тақдим этилган.
Киритилган ишлар бўйича судлар томонидан 68,5 мингта 224 миллиард сўмлик суд қарорлари қабул қилиниб, бугунги кунда МИБ билан ҳамкорликда ижро варақалари ижросини таъминлаш бўйича ишлар давом эттирилмоқда.
“Ўзсувтаъминот” маълумотларига кўра, Ўзбекистонда сўнгги 7 йилда аҳолининг ичимлик суви таъминотини яхшилашга 20 триллион сўмга яқин маблағ йўналтирилди. Бу сўнгги 25 йилга нисбатан 8 баравар кўпдир. Натижада аҳолининг марказлашган ичимлик суви билан таъминланганлик даражаси бугунга келиб ушбу кўрсаткич 77 фоизга етказилди.
Изоҳ (0)