Ўзбекистонда 2024 йилда Рақобат қонунчилиги талаблари бузилиши ортидан 200 мингдан ортиқ истеъмолчига 50 миллиард сўмга яқин маблағ қайта ҳисоб-китоб қилинган. Бу ҳақда Рақобат қўмитаси матбуот хизмати хабар берди.
Қўмита томонидан нархларнинг асоссиз ошишининг олдини олиш, истеъмолчилар ҳуқуқларини ҳимоя қилиш ва табиий монополия субъектларини тартибга солиш борасида бир қатор таҳлил ва назорат ишлари олиб борилган. 2024 йил давомида ўтказилган ўрганишлар натижасида Рақобат қонунчилиги талаблари бузилган 400 дан ортиқ ҳолат юзасидан хўжалик юритувчи субъектларга нисбатан белгиланган тартибда ишлар қўзғатилган. Олиб борилган ишлар ва қўмита томонидан берилган кўрсатмалар натижасида 200 мингдан ортиқ истеъмолчига 50 миллиард сўмга яқин маблағ қайта ҳисоб-китоб қилиниши таъминланган.
Жумладан, “Ўзсувтаъминот” АЖ томонидан Вазирлар Маҳкамасининг 2010 йил 28 октябрдаги 239-сонли қарори билан тасдиқланган низомда назарда тутилган нарх шакллантириш талаблари бузилгани аниқланди. Бунинг натижасида “Ўзсувтаъминот” АЖ томонидан 7 миллиард сўмга яқин ортиқча даромад олингани маълум бўлиб, тегишли кўрсатма берилди ва ижроси таъминланди.
“Ҳудудий электр тармоқлари” АЖ корхона ва унинг ҳудудий филиаллари томонидан Вазирлар Маҳкамасининг 2023 йил 29 декабрдаги 722-сонли қарори билан тасдиқланган низом талаблари бузилиши натижасида 5 миллиард сўмга яқин ортиқча даромад олингани аниқланиб, истеъмолчилар фойдасига қайта ҳисоб-китоб қилиш бўйича тегишли кўрсатма берилди ва ижроси таъминланди.
Рақобат қўмитаси бу борадаги тегишли назорат тадбирлари давом эттирилаётганини билдирди.
Февраль ойи ўрталарида Навоий вилоятида ичимлик суви ва канализация хизматлари учун истеъмолчилардан 200 миллион сўмдан ортиқ пул олингани ҳақида хабар берилган эди. Бу маблағларни қайта ҳисоб-китоб қилиш бўйича бажарилиши мажбурий бўлган кўрсатма берилган. Наманган вилоятида эса маиший чиқинди ташиш хизмати бўйича истеъмолчиларга асоссиз ҳисобланган 18 миллиард сўмдан ортиқ маблағларни қайта ҳисоб-китоб қилиш бўйича кўрсатма берилганди.
Изоҳ (0)