Хоразмда ҳам ичимлик суви ва оқова хизматлар нархи оширилади

Хоразм вилоятида ҳам ичимлик суви ва оқова хизматлар бўйича янги тарифлар тасдиқланди. Бу ҳақда “Ўзсувтаъминот” матбуот хизмати хабар берди.

Унга кўра, 2023 йилнинг 3 ноябридан қуйидаги белгиланган тарифлар амалда қўлланилади:

Ичимлик суви:

• аҳоли учун 1 м³ — 2800 сўм;
• бюджет ташкилотлари учун 1 м³ — 5700 сўм;
• улгуржи истеъмолчилар учун 1 м³ — 5 700 сўм.

Оқова сув хизмати учун:

• аҳоли учун 1 м³ — 1550 сўм;
• бюджет ташкилотлари учун 1 м³ — 2400 сўм;
• улгуржи истеъмолчилар учун 1 м³ — 2400 сўм.

Маълум қилинишича, ўтган 5 йилда Хоразм вилоятида марказлашган ичимлик суви билан таъминланиш даражаси 52,1 фоиздан 85,5 фоизга етказилди. 2023 йил якуни билан бу кўрсаткич 90 фоизга етказилиши кутилмоқда.

Аҳолига ичимлик суви етказиб бериш ва оқова сув хизмати кўрсатишни яхшилаш бўйича қилинаётган ишлар қаторида Европа тикланиш ва тараққиёт банкининг 150 миллион доллар қийматида имтиёзли кредит маблағларини жалб қилиш эвазига вилоят аҳолисини ичимлик суви билан таъминловчи қуввати 200 минг м³ ли асосий Питнак ичимлик суви тозалаш иншоотини реконструкция қилиш ва қувватини 400 минг м³ га етказиш (30 миллион доллар), ичимлик суви манбасидан узоқ масофада бўлган Гурлан, Янгибозор, Шовот туманларини узлуксиз ичимлик суви билан таъминлаш мақсадида Гурлан туманида қуввати 50 минг м³ лик янги ичимлик суви тозалаш иншоотини қуриш; Урганч, Хива Питнак канализация тизимларини реконструкция қилиш ва янгидан қуриш, Гурлан туманида канализация тизимларини барпо қилиш режалаштирилган.

Бундан ташқари иш ҳақи, электр-энергия, солиқ тўловлари, хорижий кредитлар тўлови амалга оширилган бўлиб, жорий ва капитал таъмирлаш, тизимни модернизация қилиш ишларида ҳам сарф-харажатлар талаб этилади.

Юқоридагилардан келиб чиқиб, Халқ депутатлари Хоразм вилоят кенгашининг 18 октябрдаги қарорига асосан Халқ депутатлари Хоразм вилояти Кенгаши томонидан Хоразм вилоятида ичимлик суви таъминоти ва оқова сув хизматлари учун янги тарифлар (нархлар) тасдиқланди.