Навоий вилоятида ичимлик суви ва канализация хизматлари учун истеъмолчилардан 200 миллион сўмдан ортиқ пул олингани аниқланди. Бу ҳақда Рақобат қўмитаси хабар берди.
Қўмитанинг Навоий вилояти ҳудудий бошқармаси томонидан 2025 йилнинг январь ойида ўтказилган ўрганиш ва таҳлиллар натижасида вилоятда фаолият юритувчи табиий монополия субъекти ҳисобланган “Элкимё-Сувтаъминот” МЧЖ томонидан ичимлик суви етказиб бериш ва канализация хизматлари учун истеъмолчилардан 200 миллион сўмдан ортиқча пул олингани аниқланди.
Вазирлар Маҳкамасининг 722-сонли қарори билан тасдиқланган низомига мувофиқ, нархларни тартибга солувчи органнинг нархни (тарифни) декларасия қилиш (тасдиқлаш) тўғрисидаги қарори табиий монополия субъекти томонидан улар кучга киришидан 15 кун олдин оммавий ахборот воситаларида ҳамда ўз расмий веб-сайтларида эълон қилиши шартлиги белгилаб қўйилган.
Юқоридаги аниқланган ҳолатларга мувофиқ, ҳудудий бошқарма махсус комиссияси томонидан “Рақобат тўғрисида”ги қонун ҳамда Вазирлар Маҳкамасининг 722-сонли қарори билан тасдиқланган низом талаблари бузилиш аломатлари билан “Элкимё-Сувтаъминот” МЧЖга нисбатан иш қўзғатилиб, натижаси юзасидан белгиланган тартибда молиявий жарималар қўллаш ҳақида қарор қабул қилинди.
Шунингдек, истеъмолчиларга ортиқча ҳисобланган 200 миллион сўмдан ортиқ маблағларни қайта ҳисоб-китоб қилиш бўйича бажарилиши мажбурий бўлган кўрсатма берилди.
Бундан аввал Наманганда чиқинди ташиш хизмати учун аҳолидан 18 миллиард сўмдан ортиқ пул асоссиз олингани аниқланганди
Изоҳ (0)