Японияда инсон онгининг сирли олами — тушларни ёзиб олиш ва уларни қайта тиклаш бўйича илғор технология ишлаб чиқилди. Интернетда Киото шаҳридаги ATR Computational Neuroscience лабораторияси томонидан яратилган ноёб қурилма ҳақидаги видеолар кенг муҳокама қилинмоқда.
Бу технология сунъий интеллект ва юқори аниқликдаги магнит-резонанс томографияси (МРТ) ёрдамида ишлайди. Ухлаётган инсон миясидаги нейронлар фаоллиги реал вақт режимида кузатилади, сўнг сунъий интеллект алгоритмлари ушбу сигнал ва тўлқинларни визуал образларга айлантиради. Бу эса инсонларнинг нима туш кўраётгани тахминий тасвирлар орқали тиклашга ёрдам беради.
Лойиҳа раҳбари, профессор Юкиясу Камитани қуйидагича изоҳ берди:
“Биз бош мия фаоллиги асосида тушларда кўрилган образларни аниқлашга муваффақ бўлдик. Ушбу образлар тест синовида иштирок этганларнинг сўзлаб берган тушлари билан мос келди. Бу эса инсон онгини янада чуқур тадқиқ қилиш йўлидаги улкан қадамдир”.
Ушбу технология ҳозирча дастлабки босқичда, бироқ олимлар унинг келажакда психология, руҳий саломатлик, ҳатто кино саноатида ва видеоўйинлар яратишда кенг қўлланилиши мумкинлигини таъкидлашмоқда. Интернет фойдаланувчилари бу янгиликни ижобий қарши олишмоқда:
“Японлар келажакда яшайди”,
“Менга ҳозироқ шу қурилмани буюртма қилиб берсангиз!”,
“Энди тушларимни эслаб ўтиришга ҳожат қолмайди!”.
Изоҳ (0)