Yaponiyada inson ongining sirli olami — tushlarni yozib olish va ularni qayta tiklash bo‘yicha ilg‘or texnologiya ishlab chiqildi. Internetda Kioto shahridagi ATR Computational Neuroscience laboratoriyasi tomonidan yaratilgan noyob qurilma haqidagi videolar keng muhokama qilinmoqda.
Bu texnologiya sun’iy intellekt va yuqori aniqlikdagi magnit-rezonans tomografiyasi (MRT) yordamida ishlaydi. Uxlayotgan inson miyasidagi neyronlar faolligi real vaqt rejimida kuzatiladi, so‘ng sun’iy intellekt algoritmlari ushbu signal va to‘lqinlarni vizual obrazlarga aylantiradi. Bu esa insonlarning nima tush ko‘rayotgani taxminiy tasvirlar orqali tiklashga yordam beradi.
Loyiha rahbari, professor Yukiyasu Kamitani quyidagicha izoh berdi:
“Biz bosh miya faolligi asosida tushlarda ko‘rilgan obrazlarni aniqlashga muvaffaq bo‘ldik. Ushbu obrazlar test sinovida ishtirok etganlarning so‘zlab bergan tushlari bilan mos keldi. Bu esa inson ongini yanada chuqur tadqiq qilish yo‘lidagi ulkan qadamdir”.
Ushbu texnologiya hozircha dastlabki bosqichda, biroq olimlar uning kelajakda psixologiya, ruhiy salomatlik, hatto kino sanoatida va videoo‘yinlar yaratishda keng qo‘llanilishi mumkinligini ta’kidlashmoqda. Internet foydalanuvchilari bu yangilikni ijobiy qarshi olishmoqda:
“Yaponlar kelajakda yashaydi”,
“Menga hoziroq shu qurilmani buyurtma qilib bersangiz!”,
“Endi tushlarimni eslab o‘tirishga hojat qolmaydi!”.
Izoh (0)