Санъаткорлар билан бўлган суҳбатларда «Ҳар бир қўшиқ ўз омади билан яратилади», деган гапни кўп эшитамиз. Бу гапда ҳам жон бор. Чунки кутилмаганда қўшиқ миллионлаб тингловчиларга маъқул бўлиши, оддий хонандани юлдуз даражасига олиб чиқиши мумкин. Қисқасини айтганда, қўшиқ кимга омад келтиришини тахмин қилиб бўлмайди.
«Уйланамиз»
«Уйланамиз» шеъри 1993 йили хонанда Яҳёбек Мўминов таклифи билан фарғоналик шоир Эркин Йўлдош томонидан ёзилган. Хонанда Яҳёбек Мўминов шеърга мусиқа басталаб, уни кўплаб тадбирлар ва тўй-ҳашамларда ижро этган.— Бу шеър ҳам дўстим, ҳам синфдошим Эркин Йўлдош томонидан ёзилган. Мазкур тарона акаси уйланган укаларнинг «дарди» ҳисобланади, — дейди Яҳёбек Йўлдошев.
Халқимизга «Қарамайсиз» дуети билан яхши таниш бўлган хонанда Миродил Ҳакимов «Уйланамиз» қўшиқни 1997 йили қайтадан ижро этган. Ўша йиллари қўшиққа ишланган клип ҳам экранларда намойиш этилган.Аммо шоир бу хонандадан норози. У муаллифлик ҳуқуқи топталгани таъкидлаб, Адлия бошқармасидан хонандага нисбатан қонунчиликда мавжуд жазо чоралари кўрилишини сўраб, мурожаат қилган.
Бир йил аввал Достонбек Эргашев мазкур қўшиқни cover услубида ижро этди. Унинг ижроси кўпчиликка маъқул бўлди. Орадан ҳеч қанча вақт ўтмай хонанда қўшиқни «Божалар» гуруҳи билан дует тарзида ижро этди. YouTube тармоғига жойланган қўшиқ шу кунгача 6 миллион марта томоша қилинди.
«Ўйламадим»
Эски қўшиқларни янгилаб айтишга уста Достон Эргашев «Ўйламадим» қўшиғидан ҳам унумли фойдаланган. Аслида мазкур қўшиқ 1993 йили қашқадарёлик хонанда Ўктам Алиев томонидан яратилган.
— Бу қўшиқни чироқчилик Улуғбек бахши Абраев билан ҳамкорликда яратганмиз. У инсонни аввалдан ҳурмат қилардим. 1993 йили давлат тадбирида учрашиб қолганмиз ва ундан қўшиқ яратиб беришини сўраганман. 2012 йили Чироқчида қўшиққа клип ҳам олганмиз, — дейди хонанда Ўктам Алиев.
«Ўйламадим» таронасини Ўктам Алиевдан рухсат сўраб Дилшод Раҳмонов, Абдужалил Қўқонов ва Воҳиджон Исоқовлар ҳам ижро этган. Фақат уларнинг ижросидаги қўшиқлар фақатгина тўй-хизматлари рэпертуарига киритилган.
Достон Эргашев ҳам мазкур қўшиқни ижро этган ва унга клип суратга олган. «Қўшиқни бир ой давомида ўйлаб яратдим», деган жумла Ўктам Алиевни ранжитган ва икки ижодкор ўртасида низо юзага келган. Аммо тан олиш керак, Достон Эргашев ижроси аввалгиларига нисбатан омадлироқ чиқди.
«Жийда гулим»
2010 йили ёш хонанда Афсона «Жийда гулим» қўшиғини ижро этган. Мазкур тарона Шаҳло Аҳророва шеъри ва Мусахон Нурматов мусиқаси асосида яратилган. Хонанда тўрт йилдан сўнг унга клип суратга олган.
Аммо ундан аввал хонанда Озодбек Назарбеков ўзининг «Озод шоу» кўрсатувида мазкур қўшиқни Афсона билан дует тарзида ижро этган. Шундан сўнг уни якка ҳолда ижро этган. Озодбек Назарбековнинг ижроси кўпчиликка маъқул келган.
«Атиргуллар очди чирой»
«Атиргуллар очди чирой» қўшиғи 1994—1996 йилларда суратга олинган «Масхарабоз» фильми учун яратилган. Қўшиқ шеъри Азим Суюнга, мусиқаси эса Мирҳалил Маҳмудовга тегишли. Саундтрекни Козим Қаюмов ва Зайнаб Мирзатиллаевалар ижро этган. Қўшиқ фильм томошабинларида илиқ тассурот қолдирган.
Янги талқиндаги қўшиқ 2016 йили ёш хонанда Дилноза Акбарова ва Жасурбек Жабборов томонидан ижро этилган. Қўшиқ клипи YouTube тармоғида 25 миллион марта томоша қилинган. Қўшиқнинг янгича талқини аввалгисига нисбатан тингловчиларга маъқул келган.
«Дадамнинг соясида»
Хонанда Бахтиёр Ғозиев «Дадамнинг соясида» қўшиғини аввал ижро этганини, қўшиқ шеъри Хуршид Карим қаламига мансуб эканини таъкидлайди. Аммо тингловчилар Тикток тармоғида тарқалган видео сабаб қўшиқ Жалолиддин Аҳмадалиевга тегишли деб ўйлайди.
Бу можаролар сабаб Жалолиддин Аҳмадалиев YouTube’даги расмий саҳифасига ижросидаги қўшиқни жойламаган. Билишимизча, қўшиқни фақатгина халқ хизматларида куйлайди, холос.
Изоҳ (0)