TikTok маликаси: 15 яшар Нурзида ижросидаги қўшиқ шу платформанинг ўзида 63 млн марта кўрилди (видео)

Наманганлик 15 яшар Нурзида Исаева ижросидаги “Туттур Дур” қўшиғига ишланган видео бир ой давомида TikTok платформасида 63 миллион маротаба кўрилди. Бу дунё миқёсида ҳам мазкур сервисдаги энг юқори кўрсаткичлардан бири. “Дарё” мухбири Азизбек Абдувалиев ушбу ўзига хос рекорд эгаси билан учрашди.

“Бу қўшиқ озарбайжонлик Наз Деж томонида айтилган. YouTube орқали тинглаб, ёқтириб қолдим. Уни ўзимизга мослаб, кавер қилиб, Наманганда, ‘Афсоналар водийси’ боғида Халқаро хотин-қизлар кунига бағишланган концертда илк бор ижро этдим.

Шу чиқишим видеога олинган ва TikTok’ка жойланганди. Кейин продюсерим Оқилхон Тиллахоновдан мазкур видео дунё бўйича топ-10 таликка кирганлигини эшитдим.

Ҳатто шу қўшиқнинг асл ижрочиси ҳам кейинчалик биз билан алоқага чиқди”, — дейди Нурзида.

Айтиш керакки, бу Нурзида ижросидаги қўшиқларнинг илк бор бундай юқори кўрсаткичларни қайд этиши эмас. Олдироқ форс ва турк хитлари қоришмасидан иборат “Hazan /Haydi Söyle” кавери TikTok’да 23 миллион марта кўрилганди.

“Фақат хориж қўшиқларига ишланган каверларгина ижтимоий тармоқларда тарқалаётган экан деган хаёлга бормаслик керак.

Шоир Фарҳод Мўминов шеърига басталанган ‘Ёмғир’ номли муаллифлик қўшиғимиз ҳам тобора оммалашиб бормоқда. Тўй ёки тадбирларда шу қўшиғимни кўп сўрашяпти, кўришлар сони ҳам чакки эмас — 3,3 миллиондан ошди”, — дейди Нурзида.

Хонанданинг продюсери Оқилхон Тиллахоновнинг айтишича, Нурзида TikTok ўзбек сегментида 1,3 миллион обуначи тўплаб, энг кўп мухлисга эга юлдузлар қаторидан жой олган.

Қолган ижтимоий тармоқлардаги кўрсаткичлар ҳам чакки эмас: Нурзида YouTube’да 392 минг, Instagram’да эса 170 минг обуначига эга.

“Нурзиданинг чет элда ҳам мухлислари кўп. Хусусан, Озарбайжон, Қозоғистон, Тожикистон, Ҳиндистон, Покистон, Бангладеш, Ироқ, Саудия Арабистони ва бошқа давлатларда.

Туркиянинг ўзида “Туттур Дур” қўшиғига ишланган видеони 18 миллион киши кўрибди. Шу сабаб бўлса керак, Туркиядан гастрол сафарларига келиш бўйича таклиф олдик.

Хорижлик хонандалар Нурзида билан дуэт айтиш бўйича мурожаатлар ҳам қилишмоқда.

Жумладан, яқинда тожикистонлик қўшиқчи Дилшод Тоҳирийдан шундай таклиф олдик ва буни амалга оширдик ҳам”, — дейди хонанданинг продюсери Оқилхон Тиллахонов.