Ижодкорлар эндиликда муаллифлик ҳақини ойма-ой қабул қилиб олиши мумкин бўлади. Бу ҳақда “Дарё”га Ўзбекистон муаллифлик ва турдош ҳуқуқларни ҳимоя қилиш жамияти бошқарув раиси Бобур Рузиев маълум қилди.
Бугунги кунда Ўзбекистонда муаллифлик ҳуқуқи ва турдош ҳуқуқлар муҳофазасини таъминлаш, муаллиф ва ҳуқуқ эгаларининг гонорарларининг адолатли тақсимланишига эришиш, уларнинг бузилган ҳуқуқ ва қонуний манфаатларини ҳимоясини таъминлашга эришиш муҳим аҳамият касб этиб келмоқда.
Бу жараёнда мулкий ҳуқуқларни жамоавий асосда бошқарувчи ташкилотларнинг тутган ўрни алоҳида аҳамиятга эга. Зеро, рақамли технологиялар кун сайин ривожланиб бораётган бугунги бир даврда муаллифлик ҳақларини самарали йиғиш ва тақсимлашга эришиш ўзига яраша қийин ва изланиш талаб этадиган иш ҳисобланади.
Бунда эса замонавий ахборот дастурларидан фойдаланиш муҳим саналади. Айни ушбу мақсадда Ўзбекистон муаллифлик ва турдош ҳуқуқларни ҳимоя қилиш жамияти — “УзАвтор” NCМ дастурий таъминотини ишлаб чиқди ва уни ишга туширди. Мазкур тизим орқали ресторан, кафе, бар, телевидение, радиолардан ҳамда рақамли провайдер ва бошқа фойдаланувчилардан йиғилган муаллифлик ҳақини тақсимлаб бориш мўлжалланган.
Шунингдек, Ўзбекистонда биринчи маротаба YouTube видео-ҳостингидан ҳам шоир ва бастакорларга муаллифлик ҳақи тўлаб берилди ва эндиликда доимий равишда тўлаб борилиши таъминланиши режалаштирилган.
Изоҳ (0)