Хонанда Миродил Ҳакимов муаллифлик ҳуқуқини бузгани учун фарғоналик шоирга жами 140 миллион сўм миқдорида товон пули ва маънавий зарар тўлайди. Бу ҳақда «Дарё»га Андижон вилояти адлия бошқармаси маълум қилди.
Андижон вилоят адлия бошқармасининг маълум қилишича, сентябрь ойида Фуқаролик ишлари бўйича Андижон туманлараро судига «Уйланамиз» қўшиғининг матни муаллифидан муаллифлик ҳуқуқлари бузилишига чек қўйиш, муаллифлик ҳуқуқлари бузилгани учун товон пули ва маънавий зарар ундириш ҳақидаги даъво аризаси келиб тушган.
Мазкур даъво аризаси бўйича фуқаролик иши қўзғатилиб, суд мажлиси 2022 йил 7 октябрга тайинланган. 7 октябрь куни суд мажлисига даъвогарнинг ишончли вакили келган, жавобгар келмагани сабабли суд мажлиси 12 октябрга қолдирилган. Шу куни суд мажлисига тарафлар келган ва улардан кўрсатмалар олинган. Жавобгар уларга низони тинч йўл билан ҳал қилиш учун муддат беришни сўраган ва даъвогар томони рози бўлгани сабабли суд мажлиси 19 октябрга қолдирилган. Бироқ жавобгар белгиланган кунида суд мажлисига келмаганлиги сабабли суд фуқаролик ишини Фуқаролик процессуал кодексининг 220-моддасига кўра, жавобгарнинг иштирокисиз кўриб чиқишни лозим топган.
Суднинг ҳал қилув қарори билан даъво ариза қисман қаноатлантирилиб, Миродил Ҳакимовдан даъвогар Эркин Дориповга 50 миллион сўм маънавий зарар учун компенсация, базавий ҳисоблаш миқдорининг 300 баробар миқдорида (90 миллион сўм) етказилган зарар ҳисобига товон пули ундириш белгиланган. Бундан ташқари жавобгарнинг зиммасига «Уйланамиз» шеъридан муаллифнинг розилигисиз фойдаланмаслик мажбурияти юклатилган.
Аввалроқ фарғоналик шоир Эркин Йўлдош хонанда Миродил Ҳакимовдан «Уйланамиз» номли қўшиғига муаллифлик ҳуқуқини талаб қилаётгани ҳақида хабар берилганди. Андижон вилояти адлия бошқармаси хонанда шеърни муаллиф билан ҳеч қандай шартнома тузмасдан ҳуқуқ эгасининг рухсатисиз омма эътиборига ҳавола қилгани учун жаримага тортилганини маълум қилганди.
Изоҳ (0)