Америкалик қўшиқчи Мерайя Кэрини қарийб 30 йил олдинги қўшиғи учун судга беришди. Ундан 20 млн доллар талаб қилишмоқда

53 ёшли Энди Стоун қўшиқчи Мерайя Кэрини «All I Want for Christmasn Is You» Рождество қўшиғининг муаллифлик ҳуқуқларини бузгани учун судга берди, деб ёзади The Guardian.

Стоуннинг ҳисоблашича, у худди шу номдаги қўшиқнинг ҳаммуаллифи ҳисобланади ва ундан фойдаланишга рухсат бермаган. У қўшиқчидан 20 миллион доллар талаб қилмоқда.

Мерайя Кэрининг «All I Want for Christmasn Is You» қўшиғи 1994 йилда чиққан ва унинг «Меrry Christmas» номли тўртинчи студия альбомидан ўрин олган. Кэрининг қўшиғи кўплаб давлатларда юқори рейтингларни қайд этиб, унга 60 миллион доллардан ортиқ даромад олиб келган. Трек Spotify’да 1 миллиард мартадан ортиқ тингланган.

Даъвога кўра, Стоуннинг «Vince Vance and the Valiants» гуруҳи «All I Want for Christmasn Is You»ни 1989 йилда ёзган ва тақдим этган, 1993 йилда унга клип ишланган. Мусиқачи Кэри ҳамда унинг ҳаммуаллифи Уолтер Афанасевни ўз қўшиғининг «машҳурлиги ва ноёб услубидан фойдаланганликда» айбламоқда.

The Guardian’нинг таъкидлашича, Кэри ва Стоуннинг қўшиқларидаги матн ва мусиқа турлича. Бундан ташқари, АҚШ Муллифлик ҳуқуқлари бюроси «All I Want for Christmasn Is You» номли 177 та қўшиқни рўйхатдан ўтказган.

Стоуннинг адвокатлари қўшиқчи билан биринчи марта ўтган йили боғланган, бироқ «бирор келишувга эришилмаган». Марайя Кери ўзининг 2020 йилги мемуарларида «All I Want for Christmasn Is You» треки учун аввалига Рождестводан илҳомланилмаганини билдирган.